Read כֶּתֶר אֲרָם צוֹבָא - Tanah Aleppo Codex שמות 2 Bible Online

שמות 2 - כֶּתֶר אֲרָם צוֹבָא - Tanah Aleppo Codex bible

שמות 2

¹א וילך איש מבית לוי ויקח את בת לוי

²ב ותהר האשה ותלד בן ותרא אתו כי טוב הוא ותצפנהו שלשה ירחים

³ג ולא יכלה עוד הצפינו ותקח לו תבת גמא ותחמרה בחמר ובזפת ותשם בה את הילד ותשם בסוף על שפת היאר

⁴ד ותתצב אחתו מרחק לדעה מה יעשה לו

⁵ה ותרד בת פרעה לרחץ על היאר ונערתיה הלכת על יד היאר ותרא את התבה בתוך הסוף ותשלח את אמתה ותקחה

⁶ו ותפתח ותראהו את הילד והנה נער בכה ותחמל עליו--ותאמר מילדי העברים זה

⁷ז ותאמר אחתו אל בת פרעה האלך וקראתי לך אשה מינקת מן העברית ותינק לך את הילד

⁸ח ותאמר לה בת פרעה לכי ותלך העלמה ותקרא את אם הילד

⁹ט ותאמר לה בת פרעה היליכי את הילד הזה והינקהו לי ואני אתן את שכרך ותקח האשה הילד ותניקהו

¹⁰י ויגדל הילד ותבאהו לבת פרעה ויהי לה לבן ותקרא שמו משה ותאמר כי מן המים משיתהו

¹¹יא ויהי בימים ההם ויגדל משה ויצא אל אחיו וירא בסבלתם וירא איש מצרי מכה איש עברי מאחיו

¹²יב ויפן כה וכה וירא כי אין איש ויך את המצרי ויטמנהו בחול

¹³יג ויצא ביום השני והנה שני אנשים עברים נצים ויאמר לרשע למה תכה רעך

¹⁴יד ויאמר מי שמך לאיש שר ושפט עלינו--הלהרגני אתה אמר כאשר הרגת את המצרי ויירא משה ויאמר אכן נודע הדבר

¹⁵טו וישמע פרעה את הדבר הזה ויבקש להרג את משה ויברח משה מפני פרעה וישב בארץ מדין וישב על הבאר

¹⁶טז ולכהן מדין שבע בנות ותבאנה ותדלנה ותמלאנה את הרהטים להשקות צאן אביהן

¹⁷יז ויבאו הרעים ויגרשום ויקם משה ויושען וישק את צאנם

¹⁸יח ותבאנה אל רעואל אביהן ויאמר מדוע מהרתן בא היום

¹⁹יט ותאמרן--איש מצרי הצילנו מיד הרעים וגם דלה דלה לנו וישק את הצאן

²⁰כ ויאמר אל בנתיו ואיו למה זה עזבתן את האיש קראן לו ויאכל לחם

²¹כא ויואל משה לשבת את האיש ויתן את צפרה בתו למשה

²²כב ותלד בן ויקרא את שמו גרשם כי אמר--גר הייתי בארץ נכריה {פ}

²³כג ויהי בימים הרבים ההם וימת מלך מצרים ויאנחו בני ישראל מן העבדה ויזעקו ותעל שועתם אל האלהים מן העבדה

²⁴כד וישמע אלהים את נאקתם ויזכר אלהים את בריתו את אברהם את יצחק ואת יעקב

²⁵כה וירא אלהים את בני ישראל וידע אלהים {ס}