Read כֶּתֶר אֲרָם צוֹבָא - Tanah Aleppo Codex שמות 21 Bible Online

שמות 21 - כֶּתֶר אֲרָם צוֹבָא - Tanah Aleppo Codex bible

שמות 21

¹א ואלה המשפטים אשר תשים לפניהם

²ב כי תקנה עבד עברי שש שנים יעבד ובשבעת--יצא לחפשי חנם

³ג אם בגפו יבא בגפו יצא אם בעל אשה הוא ויצאה אשתו עמו

⁴ד אם אדניו יתן לו אשה וילדה לו בנים או בנות--האשה וילדיה תהיה לאדניה והוא יצא בגפו

⁵ה ואם אמר יאמר העבד אהבתי את אדני את אשתי ואת בני לא אצא חפשי

⁶ו והגישו אדניו אל האלהים והגישו אל הדלת או אל המזוזה ורצע אדניו את אזנו במרצע ועבדו לעלם {ס}

⁷ז וכי ימכר איש את בתו לאמה--לא תצא כצאת העבדים

⁸ח אם רעה בעיני אדניה אשר לא (לו) יעדה--והפדה לעם נכרי לא ימשל למכרה בבגדו בה

⁹ט ואם לבנו ייעדנה--כמשפט הבנות יעשה לה

¹⁰י אם אחרת יקח לו--שארה כסותה וענתה לא יגרע

¹¹יא ואם שלש אלה--לא יעשה לה ויצאה חנם אין כסף {ס}

¹²יב מכה איש ומת מות יומת

¹³יג ואשר לא צדה והאלהים אנה לידו--ושמתי לך מקום אשר ינוס שמה {ס}

¹⁴יד וכי יזד איש על רעהו להרגו בערמה--מעם מזבחי תקחנו למות {ס}

¹⁵טו ומכה אביו ואמו מות יומת {ס}

¹⁶טז וגנב איש ומכרו ונמצא בידו מות יומת {ס}

¹⁷יז ומקלל אביו ואמו מות יומת {ס}

¹⁸יח וכי יריבן אנשים--והכה איש את רעהו באבן או באגרף ולא ימות ונפל למשכב

¹⁹יט אם יקום והתהלך בחוץ על משענתו--ונקה המכה רק שבתו יתן ורפא ירפא {ס}

²⁰כ וכי יכה איש את עבדו או את אמתו בשבט ומת תחת ידו--נקם ינקם

²¹כא אך אם יום או יומים יעמד--לא יקם כי כספו הוא {ס}

²²כב וכי ינצו אנשים ונגפו אשה הרה ויצאו ילדיה ולא יהיה אסון--ענוש יענש כאשר ישית עליו בעל האשה ונתן בפללים

²³כג ואם אסון יהיה--ונתתה נפש תחת נפש

²⁴כד עין תחת עין שן תחת שן יד תחת יד רגל תחת רגל

²⁵כה כויה תחת כויה פצע תחת פצע חבורה תחת חבורה {ס}

²⁶כו וכי יכה איש את עין עבדו או את עין אמתו--ושחתה לחפשי ישלחנו תחת עינו

²⁷כז ואם שן עבדו או שן אמתו יפיל--לחפשי ישלחנו תחת שנו {פ}

²⁸כח וכי יגח שור את איש או את אשה ומת--סקול יסקל השור ולא יאכל את בשרו ובעל השור נקי

²⁹כט ואם שור נגח הוא מתמל שלשם והועד בבעליו ולא ישמרנו והמית איש או אשה--השור יסקל וגם בעליו יומת

³⁰ל אם כפר יושת עליו--ונתן פדין נפשו ככל אשר יושת עליו

³¹לא או בן יגח או בת יגח--כמשפט הזה יעשה לו

³²לב אם עבד יגח השור או אמה--כסף שלשים שקלים יתן לאדניו והשור יסקל {ס}

³³לג וכי יפתח איש בור או כי יכרה איש בר--ולא יכסנו ונפל שמה שור או חמור

³⁴לד בעל הבור ישלם כסף ישיב לבעליו והמת יהיה לו {ס}

³⁵לה וכי יגף שור איש את שור רעהו ומת--ומכרו את השור החי וחצו את כספו וגם את המת יחצון

³⁶לו או נודע כי שור נגח הוא מתמול שלשם ולא ישמרנו בעליו--שלם ישלם שור תחת השור והמת יהיה לו {ס} [ (Exodus 21:37) לז כי יגנב איש שור או שה וטבחו או מכרו--חמשה בקר ישלם תחת השור וארבע צאן תחת השה ]