Read כֶּתֶר אֲרָם צוֹבָא - Tanah Aleppo Codex שמות 22 Bible Online

שמות 22 - כֶּתֶר אֲרָם צוֹבָא - Tanah Aleppo Codex bible

שמות 22

¹א אם במחתרת ימצא הגנב והכה ומת--אין לו דמים

²ב אם זרחה השמש עליו דמים לו שלם ישלם--אם אין לו ונמכר בגנבתו

³ג אם המצא תמצא בידו הגנבה משור עד חמור עד שה--חיים שנים ישלם {ס}

⁴ד כי יבער איש שדה או כרם ושלח את בעירה ובער בשדה אחר--מיטב שדהו ומיטב כרמו ישלם {ס}

⁵ה כי תצא אש ומצאה קצים ונאכל גדיש או הקמה או השדה--שלם ישלם המבער את הבערה {ס}

⁶ו כי יתן איש אל רעהו כסף או כלים לשמר וגנב מבית האיש--אם ימצא הגנב ישלם שנים

⁷ז אם לא ימצא הגנב ונקרב בעל הבית אל האלהים אם לא שלח ידו במלאכת רעהו

⁸ח על כל דבר פשע על שור על חמור על שה על שלמה על כל אבדה אשר יאמר כי הוא זה--עד האלהים יבא דבר שניהם אשר ירשיען אלהים ישלם שנים לרעהו {ס}

⁹ט כי יתן איש אל רעהו חמור או שור או שה וכל בהמה--לשמר ומת או נשבר או נשבה אין ראה

¹⁰י שבעת יהוה תהיה בין שניהם--אם לא שלח ידו במלאכת רעהו ולקח בעליו ולא ישלם

¹¹יא ואם גנב יגנב מעמו--ישלם לבעליו

¹²יב אם טרף יטרף יבאהו עד הטרפה לא ישלם {פ}

¹³יג וכי ישאל איש מעם רעהו ונשבר או מת בעליו אין עמו שלם ישלם

¹⁴יד אם בעליו עמו לא ישלם אם שכיר הוא בא בשכרו {ס}

¹⁵טו וכי יפתה איש בתולה אשר לא ארשה--ושכב עמה מהר ימהרנה לו לאשה

¹⁶טז אם מאן ימאן אביה לתתה לו--כסף ישקל כמהר הבתולת {ס}

¹⁷יז מכשפה לא תחיה

¹⁸יח כל שכב עם בהמה מות יומת {ס}

¹⁹יט זבח לאלהים יחרם--בלתי ליהוה לבדו

²⁰כ וגר לא תונה ולא תלחצנו כי גרים הייתם בארץ מצרים

²¹כא כל אלמנה ויתום לא תענון

²²כב אם ענה תענה אתו--כי אם צעק יצעק אלי שמע אשמע צעקתו

²³כג וחרה אפי והרגתי אתכם בחרב והיו נשיכם אלמנות ובניכם יתמים {פ}

²⁴כד אם כסף תלוה את עמי את העני עמך--לא תהיה לו כנשה לא תשימון עליו נשך

²⁵כה אם חבל תחבל שלמת רעך--עד בא השמש תשיבנו לו

²⁶כו כי הוא כסותה לבדה הוא שמלתו לערו במה ישכב--והיה כי יצעק אלי ושמעתי כי חנון אני {ס}

²⁷כז אלהים לא תקלל ונשיא בעמך לא תאר

²⁸כח מלאתך ודמעך לא תאחר בכור בניך תתן לי

²⁹כט כן תעשה לשרך לצאנך שבעת ימים יהיה עם אמו ביום השמיני תתנו לי

³⁰ל ואנשי קדש תהיון לי ובשר בשדה טרפה לא תאכלו לכלב תשלכון אתו {ס}