Read כֶּתֶר אֲרָם צוֹבָא - Tanah Aleppo Codex שמות 24 Bible Online

שמות 24 - כֶּתֶר אֲרָם צוֹבָא - Tanah Aleppo Codex bible

שמות 24

¹א ואל משה אמר עלה אל יהוה אתה ואהרן נדב ואביהוא ושבעים מזקני ישראל והשתחויתם מרחק

²ב ונגש משה לבדו אל יהוה והם לא יגשו והעם לא יעלו עמו

³ג ויבא משה ויספר לעם את כל דברי יהוה ואת כל המשפטים ויען כל העם קול אחד ויאמרו כל הדברים אשר דבר יהוה נעשה

⁴ד ויכתב משה את כל דברי יהוה וישכם בבקר ויבן מזבח תחת ההר ושתים עשרה מצבה לשנים עשר שבטי ישראל

⁵ה וישלח את נערי בני ישראל ויעלו עלת ויזבחו זבחים שלמים ליהוה--פרים

⁶ו ויקח משה חצי הדם וישם באגנת וחצי הדם זרק על המזבח

⁷ז ויקח ספר הברית ויקרא באזני העם ויאמרו כל אשר דבר יהוה נעשה ונשמע

⁸ח ויקח משה את הדם ויזרק על העם ויאמר הנה דם הברית אשר כרת יהוה עמכם על כל הדברים האלה

⁹ט ויעל משה ואהרן--נדב ואביהוא ושבעים מזקני ישראל

¹⁰י ויראו את אלהי ישראל ותחת רגליו כמעשה לבנת הספיר וכעצם השמים לטהר

¹¹יא ואל אצילי בני ישראל לא שלח ידו ויחזו את האלהים ויאכלו וישתו {ס}

¹²יב ויאמר יהוה אל משה עלה אלי ההרה--והיה שם ואתנה לך את לחת האבן והתורה והמצוה אשר כתבתי להורתם

¹³יג ויקם משה ויהושע משרתו ויעל משה אל הר האלהים

¹⁴יד ואל הזקנים אמר שבו לנו בזה עד אשר נשוב אליכם והנה אהרן וחור עמכם מי בעל דברים יגש אלהם

¹⁵טו ויעל משה אל ההר ויכס הענן את ההר

¹⁶טז וישכן כבוד יהוה על הר סיני ויכסהו הענן ששת ימים ויקרא אל משה ביום השביעי מתוך הענן

¹⁷יז ומראה כבוד יהוה כאש אכלת בראש ההר לעיני בני ישראל

¹⁸יח ויבא משה בתוך הענן ויעל אל ההר ויהי משה בהר ארבעים יום וארבעים לילה {פ}