Read כֶּתֶר אֲרָם צוֹבָא - Tanah Aleppo Codex שמות 27 Bible Online

שמות 27 - כֶּתֶר אֲרָם צוֹבָא - Tanah Aleppo Codex bible

שמות 27

¹א ועשית את המזבח עצי שטים חמש אמות ארך וחמש אמות רחב רבוע יהיה המזבח ושלש אמות קמתו

²ב ועשית קרנתיו על ארבע פנתיו--ממנו תהיין קרנתיו וצפית אתו נחשת

³ג ועשית סירתיו לדשנו ויעיו ומזרקתיו ומזלגתיו ומחתתיו לכל כליו תעשה נחשת

⁴ד ועשית לו מכבר מעשה רשת נחשת ועשית על הרשת ארבע טבעת נחשת על ארבע קצותיו

⁵ה ונתתה אתה תחת כרכב המזבח--מלמטה והיתה הרשת עד חצי המזבח

⁶ו ועשית בדים למזבח בדי עצי שטים וצפית אתם נחשת

⁷ז והובא את בדיו בטבעת והיו הבדים על שתי צלעת המזבח--בשאת אתו

⁸ח נבוב לחת תעשה אתו כאשר הראה אתך בהר כן יעשו {ס}

⁹ט ועשית את חצר המשכן--לפאת נגב תימנה קלעים לחצר שש משזר מאה באמה ארך לפאה האחת

¹⁰י ועמדיו עשרים ואדניהם עשרים נחשת ווי העמדים וחשקיהם כסף

¹¹יא וכן לפאת צפון בארך קלעים מאה ארך ועמדו עשרים ואדניהם עשרים נחשת ווי העמדים וחשקיהם כסף

¹²יב ורחב החצר לפאת ים קלעים חמשים אמה עמדיהם עשרה ואדניהם עשרה

¹³יג ורחב החצר לפאת קדמה מזרחה--חמשים אמה

¹⁴יד וחמש עשרה אמה קלעים לכתף עמדיהם שלשה ואדניהם שלשה

¹⁵טו ולכתף השנית--חמש עשרה קלעים עמדיהם שלשה ואדניהם שלשה

¹⁶טז ולשער החצר מסך עשרים אמה תכלת וארגמן ותולעת שני ושש משזר--מעשה רקם עמדיהם ארבעה ואדניהם ארבעה

¹⁷יז כל עמודי החצר סביב מחשקים כסף וויהם כסף ואדניהם נחשת

¹⁸יח ארך החצר מאה באמה ורחב חמשים בחמשים וקמה חמש אמות--שש משזר ואדניהם נחשת

¹⁹יט לכל כלי המשכן בכל עבדתו וכל יתדתיו וכל יתדת החצר נחשת {ס}

²⁰כ ואתה תצוה את בני ישראל ויקחו אליך שמן זית זך כתית--למאור להעלת נר תמיד

²¹כא באהל מועד מחוץ לפרכת אשר על העדת יערך אתו אהרן ובניו מערב עד בקר--לפני יהוה חקת עולם לדרתם מאת בני ישראל {ס}