Read כֶּתֶר אֲרָם צוֹבָא - Tanah Aleppo Codex שמות 28 Bible Online

שמות 28 - כֶּתֶר אֲרָם צוֹבָא - Tanah Aleppo Codex bible

שמות 28

¹א ואתה הקרב אליך את אהרן אחיך ואת בניו אתו מתוך בני ישראל--לכהנו לי אהרן--נדב ואביהוא אלעזר ואיתמר בני אהרן

²ב ועשית בגדי קדש לאהרן אחיך לכבוד ולתפארת

³ג ואתה תדבר אל כל חכמי לב אשר מלאתיו רוח חכמה ועשו את בגדי אהרן לקדשו--לכהנו לי

⁴ד ואלה הבגדים אשר יעשו חשן ואפוד ומעיל וכתנת תשבץ מצנפת ואבנט ועשו בגדי קדש לאהרן אחיך ולבניו--לכהנו לי

⁵ה והם יקחו את הזהב ואת התכלת ואת הארגמן ואת תולעת השני ואת השש {פ}

⁶ו ועשו את האפד זהב תכלת וארגמן תולעת שני ושש משזר--מעשה חשב

⁷ז שתי כתפת חברת יהיה לו אל שני קצותיו--וחבר

⁸ח וחשב אפדתו אשר עליו כמעשהו ממנו יהיה זהב תכלת וארגמן ותולעת שני--ושש משזר

⁹ט ולקחת את שתי אבני שהם ופתחת עליהם שמות בני ישראל

¹⁰י ששה משמתם על האבן האחת ואת שמות הששה הנותרים על האבן השנית--כתולדתם

¹¹יא מעשה חרש אבן--פתוחי חתם תפתח את שתי האבנים על שמת בני ישראל מסבת משבצות זהב תעשה אתם

¹²יב ושמת את שתי האבנים על כתפת האפד אבני זכרן לבני ישראל ונשא אהרן את שמותם לפני יהוה על שתי כתפיו--לזכרן {ס}

¹³יג ועשית משבצת זהב

¹⁴יד ושתי שרשרת זהב טהור מגבלת תעשה אתם מעשה עבת ונתתה את שרשרת העבתת על המשבצת {ס}

¹⁵טו ועשית חשן משפט מעשה חשב--כמעשה אפד תעשנו זהב תכלת וארגמן ותולעת שני ושש משזר--תעשה אתו

¹⁶טז רבוע יהיה כפול זרת ארכו וזרת רחבו

¹⁷יז ומלאת בו מלאת אבן ארבעה טורים אבן טור אדם פטדה וברקת--הטור האחד

¹⁸יח והטור השני--נפך ספיר ויהלם

¹⁹יט והטור השלישי--לשם שבו ואחלמה

²⁰כ והטור הרביעי--תרשיש ושהם וישפה משבצים זהב יהיו במלואתם

²¹כא והאבנים תהיין על שמת בני ישראל שתים עשרה--על שמתם פתוחי חותם איש על שמו תהיין לשני עשר שבט

²²כב ועשית על החשן שרשת גבלת מעשה עבת זהב טהור

²³כג ועשית על החשן שתי טבעות זהב ונתת את שתי הטבעות על שני קצות החשן

²⁴כד ונתתה את שתי עבתת הזהב על שתי הטבעת--אל קצות החשן

²⁵כה ואת שתי קצות שתי העבתת תתן על שתי המשבצות ונתתה על כתפות האפד אל מול פניו

²⁶כו ועשית שתי טבעות זהב ושמת אתם על שני קצות החשן--על שפתו אשר אל עבר האפד ביתה

²⁷כז ועשית שתי טבעות זהב ונתתה אתם על שתי כתפות האפוד מלמטה ממול פניו לעמת מחברתו--ממעל לחשב האפוד

²⁸כח וירכסו את החשן מטבעתו אל טבעת האפוד בפתיל תכלת להיות על חשב האפוד ולא יזח החשן מעל האפוד

²⁹כט ונשא אהרן את שמות בני ישראל בחשן המשפט על לבו--בבאו אל הקדש לזכרן לפני יהוה תמיד

³⁰ל ונתת אל חשן המשפט את האורים ואת התמים והיו על לב אהרן בבאו לפני יהוה ונשא אהרן את משפט בני ישראל על לבו לפני יהוה--תמיד {ס}

³¹לא ועשית את מעיל האפוד כליל תכלת

³²לב והיה פי ראשו בתוכו שפה יהיה לפיו סביב מעשה ארג כפי תחרא יהיה לו--לא יקרע

³³לג ועשית על שוליו רמני תכלת וארגמן ותולעת שני--על שוליו סביב ופעמני זהב בתוכם סביב

³⁴לד פעמן זהב ורמון פעמן זהב ורמון על שולי המעיל סביב

³⁵לה והיה על אהרן לשרת ונשמע קולו בבאו אל הקדש לפני יהוה ובצאתו--ולא ימות {ס}

³⁶לו ועשית ציץ זהב טהור ופתחת עליו פתוחי חתם קדש ליהוה

³⁷לז ושמת אתו על פתיל תכלת והיה על המצנפת אל מול פני המצנפת יהיה

³⁸לח והיה על מצח אהרן ונשא אהרן את עון הקדשים אשר יקדישו בני ישראל לכל מתנת קדשיהם והיה על מצחו תמיד לרצון להם לפני יהוה

³⁹לט ושבצת הכתנת שש ועשית מצנפת שש ואבנט תעשה מעשה רקם

⁴⁰מ ולבני אהרן תעשה כתנת ועשית להם אבנטים ומגבעות תעשה להם לכבוד ולתפארת

⁴¹מא והלבשת אתם את אהרן אחיך ואת בניו אתו ומשחת אתם ומלאת את ידם וקדשת אתם--וכהנו לי

⁴²מב ועשה להם מכנסי בד לכסות בשר ערוה ממתנים ועד ירכים יהיו

⁴³מג והיו על אהרן ועל בניו בבאם אל אהל מועד או בגשתם אל המזבח לשרת בקדש ולא ישאו עון ומתו חקת עולם לו ולזרעו אחריו {ס}