Read כֶּתֶר אֲרָם צוֹבָא - Tanah Aleppo Codex שמות 29 Bible Online

שמות 29 - כֶּתֶר אֲרָם צוֹבָא - Tanah Aleppo Codex bible

שמות 29

¹א וזה הדבר אשר תעשה להם לקדש אתם--לכהן לי לקח פר אחד בן בקר ואילם שנים--תמימם

²ב ולחם מצות וחלת מצת בלולת בשמן ורקיקי מצות משחים בשמן סלת חטים תעשה אתם

³ג ונתת אותם על סל אחד והקרבת אתם בסל ואת הפר--ואת שני האילם

⁴ד ואת אהרן ואת בניו תקריב אל פתח אהל מועד ורחצת אתם במים

⁵ה ולקחת את הבגדים והלבשת את אהרן את הכתנת ואת מעיל האפד ואת האפד ואת החשן ואפדת לו בחשב האפד

⁶ו ושמת המצנפת על ראשו ונתת את נזר הקדש על המצנפת

⁷ז ולקחת את שמן המשחה ויצקת על ראשו ומשחת אתו

⁸ח ואת בניו תקריב והלבשתם כתנת

⁹ט וחגרת אתם אבנט אהרן ובניו וחבשת להם מגבעת והיתה להם כהנה לחקת עולם ומלאת יד אהרן ויד בניו

¹⁰י והקרבת את הפר לפני אהל מועד וסמך אהרן ובניו את ידיהם על ראש הפר

¹¹יא ושחטת את הפר לפני יהוה פתח אהל מועד

¹²יב ולקחת מדם הפר ונתתה על קרנת המזבח באצבעך ואת כל הדם תשפך אל יסוד המזבח

¹³יג ולקחת את כל החלב המכסה את הקרב ואת היתרת על הכבד ואת שתי הכלית ואת החלב אשר עליהן והקטרת המזבחה

¹⁴יד ואת בשר הפר ואת ערו ואת פרשו תשרף באש מחוץ למחנה חטאת הוא

¹⁵טו ואת האיל האחד תקח וסמכו אהרן ובניו את ידיהם--על ראש האיל

¹⁶טז ושחטת את האיל ולקחת את דמו וזרקת על המזבח סביב

¹⁷יז ואת האיל--תנתח לנתחיו ורחצת קרבו וכרעיו ונתת על נתחיו ועל ראשו

¹⁸יח והקטרת את כל האיל המזבחה עלה הוא ליהוה ריח ניחוח אשה ליהוה הוא

¹⁹יט ולקחת את האיל השני וסמך אהרן ובניו את ידיהם על ראש האיל

²⁰כ ושחטת את האיל ולקחת מדמו ונתתה על תנוך אזן אהרן ועל תנוך אזן בניו הימנית ועל בהן ידם הימנית ועל בהן רגלם הימנית וזרקת את הדם על המזבח סביב

²¹כא ולקחת מן הדם אשר על המזבח ומשמן המשחה והזית על אהרן ועל בגדיו ועל בניו ועל בגדי בניו אתו וקדש הוא ובגדיו ובניו ובגדי בניו אתו

²²כב ולקחת מן האיל החלב והאליה ואת החלב המכסה את הקרב ואת יתרת הכבד ואת שתי הכלית ואת החלב אשר עליהן ואת שוק הימין כי איל מלאים הוא

²³כג וככר לחם אחת וחלת לחם שמן אחת--ורקיק אחד מסל המצות אשר לפני יהוה

²⁴כד ושמת הכל--על כפי אהרן ועל כפי בניו והנפת אתם תנופה לפני יהוה

²⁵כה ולקחת אתם מידם והקטרת המזבחה על העלה לריח ניחוח לפני יהוה אשה הוא ליהוה

²⁶כו ולקחת את החזה מאיל המלאים אשר לאהרן והנפת אתו תנופה לפני יהוה והיה לך למנה

²⁷כז וקדשת את חזה התנופה ואת שוק התרומה אשר הונף ואשר הורם מאיל המלאים--מאשר לאהרן ומאשר לבניו

²⁸כח והיה לאהרן ולבניו לחק עולם מאת בני ישראל כי תרומה הוא ותרומה יהיה מאת בני ישראל מזבחי שלמיהם--תרומתם ליהוה

²⁹כט ובגדי הקדש אשר לאהרן יהיו לבניו אחריו למשחה בהם ולמלא בם את ידם

³⁰ל שבעת ימים ילבשם הכהן תחתיו--מבניו אשר יבא אל אהל מועד לשרת בקדש

³¹לא ואת איל המלאים תקח ובשלת את בשרו במקם קדש

³²לב ואכל אהרן ובניו את בשר האיל ואת הלחם אשר בסל פתח אהל מועד

³³לג ואכלו אתם אשר כפר בהם למלא את ידם לקדש אתם וזר לא יאכל כי קדש הם

³⁴לד ואם יותר מבשר המלאים ומן הלחם--עד הבקר ושרפת את הנותר באש לא יאכל כי קדש הוא

³⁵לה ועשית לאהרן ולבניו ככה ככל אשר צויתי אתכה שבעת ימים תמלא ידם

³⁶לו ופר חטאת תעשה ליום על הכפרים וחטאת על המזבח בכפרך עליו ומשחת אתו לקדשו

³⁷לז שבעת ימים תכפר על המזבח וקדשת אתו והיה המזבח קדש קדשים כל הנגע במזבח יקדש {ס}

³⁸לח וזה אשר תעשה על המזבח כבשים בני שנה שנים ליום תמיד

³⁹לט את הכבש האחד תעשה בבקר ואת הכבש השני תעשה בין הערבים

⁴⁰מ ועשרן סלת בלול בשמן כתית רבע ההין ונסך רביעת ההין יין--לכבש האחד

⁴¹מא ואת הכבש השני תעשה בין הערבים כמנחת הבקר וכנסכה תעשה לה לריח ניחח אשה ליהוה

⁴²מב עלת תמיד לדרתיכם פתח אהל מועד לפני יהוה אשר אועד לכם שמה לדבר אליך שם

⁴³מג ונעדתי שמה לבני ישראל ונקדש בכבדי

⁴⁴מד וקדשתי את אהל מועד ואת המזבח ואת אהרן ואת בניו אקדש לכהן לי

⁴⁵מה ושכנתי בתוך בני ישראל והייתי להם לאלהים

⁴⁶מו וידעו כי אני יהוה אלהיהם אשר הוצאתי אתם מארץ מצרים לשכני בתוכם אני יהוה אלהיהם {פ}