Read כֶּתֶר אֲרָם צוֹבָא - Tanah Aleppo Codex שמות 31 Bible Online

שמות 31 - כֶּתֶר אֲרָם צוֹבָא - Tanah Aleppo Codex bible

שמות 31

¹א וידבר יהוה אל משה לאמר

²ב ראה קראתי בשם בצלאל בן אורי בן חור למטה יהודה

³ג ואמלא אתו רוח אלהים בחכמה ובתבונה ובדעת ובכל מלאכה

⁴ד לחשב מחשבת לעשות בזהב ובכסף ובנחשת

⁵ה ובחרשת אבן למלאת ובחרשת עץ לעשות בכל מלאכה

⁶ו ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשו את כל אשר צויתך

⁷ז את אהל מועד ואת הארן לעדת ואת הכפרת אשר עליו ואת כל כלי האהל

⁸ח ואת השלחן ואת כליו ואת המנרה הטהרה ואת כל כליה ואת מזבח הקטרת

⁹ט ואת מזבח העלה ואת כל כליו ואת הכיור ואת כנו

¹⁰י ואת בגדי השרד ואת בגדי הקדש לאהרן הכהן ואת בגדי בניו לכהן

¹¹יא ואת שמן המשחה ואת קטרת הסמים לקדש ככל אשר צויתך יעשו {פ}

¹²יב ויאמר יהוה אל משה לאמר

¹³יג ואתה דבר אל בני ישראל לאמר אך את שבתתי תשמרו כי אות הוא ביני וביניכם לדרתיכם--לדעת כי אני יהוה מקדשכם

¹⁴יד ושמרתם את השבת כי קדש הוא לכם מחלליה מות יומת--כי כל העשה בה מלאכה ונכרתה הנפש ההוא מקרב עמיה

¹⁵טו ששת ימים יעשה מלאכה וביום השביעי שבת שבתון קדש ליהוה כל העשה מלאכה ביום השבת מות יומת

¹⁶טז ושמרו בני ישראל את השבת לעשות את השבת לדרתם ברית עולם

¹⁷יז ביני ובין בני ישראל--אות הוא לעלם כי ששת ימים עשה יהוה את השמים ואת הארץ וביום השביעי שבת וינפש {ס}

¹⁸יח ויתן אל משה ככלתו לדבר אתו בהר סיני שני לחת העדת--לחת אבן כתבים באצבע אלהים