Read כֶּתֶר אֲרָם צוֹבָא - Tanah Aleppo Codex שמות 32 Bible Online

שמות 32 - כֶּתֶר אֲרָם צוֹבָא - Tanah Aleppo Codex bible

שמות 32

¹א וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו--כי זה משה האיש אשר העלנו מארץ מצרים לא ידענו מה היה לו

²ב ויאמר אלהם אהרן פרקו נזמי הזהב אשר באזני נשיכם בניכם ובנתיכם והביאו אלי

³ג ויתפרקו כל העם את נזמי הזהב אשר באזניהם ויביאו אל אהרן

⁴ד ויקח מידם ויצר אתו בחרט ויעשהו עגל מסכה ויאמרו--אלה אלהיך ישראל אשר העלוך מארץ מצרים

⁵ה וירא אהרן ויבן מזבח לפניו ויקרא אהרן ויאמר חג ליהוה מחר

⁶ו וישכימו ממחרת ויעלו עלת ויגשו שלמים וישב העם לאכל ושתו ויקמו לצחק {פ}

⁷ז וידבר יהוה אל משה לך רד--כי שחת עמך אשר העלית מארץ מצרים

⁸ח סרו מהר מן הדרך אשר צויתם--עשו להם עגל מסכה וישתחוו לו ויזבחו לו ויאמרו אלה אלהיך ישראל אשר העלוך מארץ מצרים

⁹ט ויאמר יהוה אל משה ראיתי את העם הזה והנה עם קשה ערף הוא

¹⁰י ועתה הניחה לי ויחר אפי בהם ואכלם ואעשה אותך לגוי גדול

¹¹יא ויחל משה את פני יהוה אלהיו ויאמר למה יהוה יחרה אפך בעמך אשר הוצאת מארץ מצרים בכח גדול וביד חזקה

¹²יב למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמך

¹³יג זכר לאברהם ליצחק ולישראל עבדיך אשר נשבעת להם בך ותדבר אלהם ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלו לעלם

¹⁴יד וינחם יהוה על הרעה אשר דבר לעשות לעמו {פ}

¹⁵טו ויפן וירד משה מן ההר ושני לחת העדת בידו לחת כתבים משני עבריהם--מזה ומזה הם כתבים

¹⁶טז והלחת--מעשה אלהים המה והמכתב מכתב אלהים הוא--חרות על הלחת

¹⁷יז וישמע יהושע את קול העם ברעה ויאמר אל משה קול מלחמה במחנה

¹⁸יח ויאמר אין קול ענות גבורה ואין קול ענות חלושה קול ענות אנכי שמע

¹⁹יט ויהי כאשר קרב אל המחנה וירא את העגל ומחלת ויחר אף משה וישלך מידו את הלחת וישבר אתם תחת ההר

²⁰כ ויקח את העגל אשר עשו וישרף באש ויטחן עד אשר דק ויזר על פני המים וישק את בני ישראל

²¹כא ויאמר משה אל אהרן מה עשה לך העם הזה כי הבאת עליו חטאה גדלה

²²כב ויאמר אהרן אל יחר אף אדני אתה ידעת את העם כי ברע הוא

²³כג ויאמרו לי--עשה לנו אלהים אשר ילכו לפנינו כי זה משה האיש אשר העלנו מארץ מצרים--לא ידענו מה היה לו

²⁴כד ואמר להם למי זהב התפרקו ויתנו לי ואשלכהו באש ויצא העגל הזה

²⁵כה וירא משה את העם כי פרע הוא כי פרעה אהרן לשמצה בקמיהם

²⁶כו ויעמד משה בשער המחנה ויאמר מי ליהוה אלי ויאספו אליו כל בני לוי

²⁷כז ויאמר להם כה אמר יהוה אלהי ישראל שימו איש חרבו על ירכו עברו ושובו משער לשער במחנה והרגו איש את אחיו ואיש את רעהו ואיש את קרבו

²⁸כח ויעשו בני לוי כדבר משה ויפל מן העם ביום ההוא כשלשת אלפי איש

²⁹כט ויאמר משה מלאו ידכם היום ליהוה כי איש בבנו ובאחיו--ולתת עליכם היום ברכה

³⁰ל ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכם

³¹לא וישב משה אל יהוה ויאמר אנא חטא העם הזה חטאה גדלה ויעשו להם אלהי זהב

³²לב ועתה אם תשא חטאתם ואם אין--מחני נא מספרך אשר כתבת

³³לג ויאמר יהוה אל משה מי אשר חטא לי אמחנו מספרי

³⁴לד ועתה לך נחה את העם אל אשר דברתי לך--הנה מלאכי ילך לפניך וביום פקדי ופקדתי עלהם חטאתם

³⁵לה ויגף יהוה את העם על אשר עשו את העגל אשר עשה אהרן {ס}