Read כֶּתֶר אֲרָם צוֹבָא - Tanah Aleppo Codex שמות 33 Bible Online

שמות 33 - כֶּתֶר אֲרָם צוֹבָא - Tanah Aleppo Codex bible

שמות 33

¹א וידבר יהוה אל משה לך עלה מזה--אתה והעם אשר העלית מארץ מצרים אל הארץ אשר נשבעתי לאברהם ליצחק וליעקב לאמר לזרעך אתננה

²ב ושלחתי לפניך מלאך וגרשתי את הכנעני האמרי והחתי והפרזי החוי והיבוסי

³ג אל ארץ זבת חלב ודבש כי לא אעלה בקרבך כי עם קשה ערף אתה--פן אכלך בדרך

⁴ד וישמע העם את הדבר הרע הזה--ויתאבלו ולא שתו איש עדיו עליו

⁵ה ויאמר יהוה אל משה אמר אל בני ישראל אתם עם קשה ערף--רגע אחד אעלה בקרבך וכליתיך ועתה הורד עדיך מעליך ואדעה מה אעשה לך

⁶ו ויתנצלו בני ישראל את עדים מהר חורב

⁷ז ומשה יקח את האהל ונטה לו מחוץ למחנה הרחק מן המחנה וקרא לו אהל מועד והיה כל מבקש יהוה יצא אל אהל מועד אשר מחוץ למחנה

⁸ח והיה כצאת משה אל האהל יקומו כל העם ונצבו איש פתח אהלו והביטו אחרי משה עד באו האהלה

⁹ט והיה כבא משה האהלה ירד עמוד הענן ועמד פתח האהל ודבר עם משה

¹⁰י וראה כל העם את עמוד הענן עמד פתח האהל וקם כל העם והשתחוו איש פתח אהלו

¹¹יא ודבר יהוה אל משה פנים אל פנים כאשר ידבר איש אל רעהו ושב אל המחנה ומשרתו יהושע בן נון נער לא ימיש מתוך האהל {פ}

¹²יב ויאמר משה אל יהוה ראה אתה אמר אלי העל את העם הזה ואתה לא הודעתני את אשר תשלח עמי ואתה אמרת ידעתיך בשם וגם מצאת חן בעיני

¹³יג ועתה אם נא מצאתי חן בעיניך הודעני נא את דרכך ואדעך למען אמצא חן בעיניך וראה כי עמך הגוי הזה

¹⁴יד ויאמר פני ילכו והנחתי לך

¹⁵טו ויאמר אליו אם אין פניך הלכים אל תעלנו מזה

¹⁶טז ובמה יודע אפוא כי מצאתי חן בעיניך אני ועמך--הלוא בלכתך עמנו ונפלינו אני ועמך מכל העם אשר על פני האדמה {פ}

¹⁷יז ויאמר יהוה אל משה גם את הדבר הזה אשר דברת אעשה כי מצאת חן בעיני ואדעך בשם

¹⁸יח ויאמר הראני נא את כבדך

¹⁹יט ויאמר אני אעביר כל טובי על פניך וקראתי בשם יהוה לפניך וחנתי את אשר אחן ורחמתי את אשר ארחם

²⁰כ ויאמר לא תוכל לראת את פני כי לא יראני האדם וחי

²¹כא ויאמר יהוה הנה מקום אתי ונצבת על הצור

²²כב והיה בעבר כבדי ושמתיך בנקרת הצור ושכתי כפי עליך עד עברי

²³כג והסרתי את כפי וראית את אחרי ופני לא יראו {פ}