Read כֶּתֶר אֲרָם צוֹבָא - Tanah Aleppo Codex שמות 34 Bible Online

שמות 34 - כֶּתֶר אֲרָם צוֹבָא - Tanah Aleppo Codex bible

שמות 34

¹א ויאמר יהוה אל משה פסל לך שני לחת אבנים כראשנים וכתבתי על הלחת את הדברים אשר היו על הלחת הראשנים אשר שברת

²ב והיה נכון לבקר ועלית בבקר אל הר סיני ונצבת לי שם על ראש ההר

³ג ואיש לא יעלה עמך וגם איש אל ירא בכל ההר גם הצאן והבקר אל ירעו אל מול ההר ההוא

⁴ד ויפסל שני לחת אבנים כראשנים וישכם משה בבקר ויעל אל הר סיני כאשר צוה יהוה אתו ויקח בידו שני לחת אבנים

⁵ה וירד יהוה בענן ויתיצב עמו שם ויקרא בשם יהוה

⁶ו ויעבר יהוה על פניו ויקרא יהוה יהוה אל רחום וחנון--ארך אפים ורב חסד ואמת

⁷ז נצר חסד לאלפים נשא עון ופשע וחטאה ונקה לא ינקה--פקד עון אבות על בנים ועל בני בנים על שלשים ועל רבעים

⁸ח וימהר משה ויקד ארצה וישתחו

⁹ט ויאמר אם נא מצאתי חן בעיניך אדני ילך נא אדני בקרבנו כי עם קשה ערף הוא וסלחת לעוננו ולחטאתנו ונחלתנו

¹⁰י ויאמר הנה אנכי כרת ברית נגד כל עמך אעשה נפלאת אשר לא נבראו בכל הארץ ובכל הגוים וראה כל העם אשר אתה בקרבו את מעשה יהוה כי נורא הוא אשר אני עשה עמך

¹¹יא שמר לך--את אשר אנכי מצוך היום הנני גרש מפניך את האמרי והכנעני והחתי והפרזי והחוי והיבוסי

¹²יב השמר לך פן תכרת ברית ליושב הארץ אשר אתה בא עליה פן יהיה למוקש בקרבך

¹³יג כי את מזבחתם תתצון ואת מצבתם תשברון ואת אשריו תכרתון

¹⁴יד כי לא תשתחוה לאל אחר כי יהוה קנא שמו אל קנא הוא

¹⁵טו פן תכרת ברית ליושב הארץ וזנו אחרי אלהיהם וזבחו לאלהיהם וקרא לך ואכלת מזבחו

¹⁶טז ולקחת מבנתיו לבניך וזנו בנתיו אחרי אלהיהן והזנו את בניך אחרי אלהיהן

¹⁷יז אלהי מסכה לא תעשה לך

¹⁸יח את חג המצות תשמר--שבעת ימים תאכל מצות אשר צויתך למועד חדש האביב כי בחדש האביב יצאת ממצרים

¹⁹יט כל פטר רחם לי וכל מקנך תזכר פטר שור ושה

²⁰כ ופטר חמור תפדה בשה ואם לא תפדה וערפתו כל בכור בניך תפדה ולא יראו פני ריקם

²¹כא ששת ימים תעבד וביום השביעי תשבת בחריש ובקציר תשבת

²²כב וחג שבעת תעשה לך בכורי קציר חטים וחג האסיף--תקופת השנה

²³כג שלש פעמים בשנה--יראה כל זכורך את פני האדן יהוה אלהי ישראל

²⁴כד כי אוריש גוים מפניך והרחבתי את גבלך ולא יחמד איש את ארצך בעלתך לראות את פני יהוה אלהיך שלש פעמים בשנה

²⁵כה לא תשחט על חמץ דם זבחי ולא ילין לבקר זבח חג הפסח

²⁶כו ראשית בכורי אדמתך תביא בית יהוה אלהיך לא תבשל גדי בחלב אמו {פ}

²⁷כז ויאמר יהוה אל משה כתב לך את הדברים האלה כי על פי הדברים האלה כרתי אתך ברית--ואת ישראל

²⁸כח ויהי שם עם יהוה ארבעים יום וארבעים לילה--לחם לא אכל ומים לא שתה ויכתב על הלחת את דברי הברית--עשרת הדברים

²⁹כט ויהי ברדת משה מהר סיני ושני לחת העדת ביד משה ברדתו מן ההר ומשה לא ידע כי קרן עור פניו--בדברו אתו

³⁰ל וירא אהרן וכל בני ישראל את משה והנה קרן עור פניו וייראו מגשת אליו

³¹לא ויקרא אלהם משה וישבו אליו אהרן וכל הנשאים בעדה וידבר משה אלהם

³²לב ואחרי כן נגשו כל בני ישראל ויצום--את כל אשר דבר יהוה אתו בהר סיני

³³לג ויכל משה מדבר אתם ויתן על פניו מסוה

³⁴לד ובבא משה לפני יהוה לדבר אתו יסיר את המסוה עד צאתו ויצא ודבר אל בני ישראל את אשר יצוה

³⁵לה וראו בני ישראל את פני משה כי קרן עור פני משה והשיב משה את המסוה על פניו עד באו לדבר אתו {ס}