Read כֶּתֶר אֲרָם צוֹבָא - Tanah Aleppo Codex שמות 35 Bible Online

שמות 35 - כֶּתֶר אֲרָם צוֹבָא - Tanah Aleppo Codex bible

שמות 35

¹א ויקהל משה את כל עדת בני ישראל--ויאמר אלהם אלה הדברים אשר צוה יהוה לעשת אתם

²ב ששת ימים תעשה מלאכה וביום השביעי יהיה לכם קדש שבת שבתון ליהוה כל העשה בו מלאכה יומת

³ג לא תבערו אש בכל משבתיכם ביום השבת {פ}

⁴ד ויאמר משה אל כל עדת בני ישראל לאמר זה הדבר אשר צוה יהוה לאמר

⁵ה קחו מאתכם תרומה ליהוה כל נדיב לבו יביאה את תרומת יהוה זהב וכסף ונחשת

⁶ו ותכלת וארגמן ותולעת שני ושש ועזים

⁷ז וערת אילם מאדמים וערת תחשים ועצי שטים

⁸ח ושמן למאור ובשמים לשמן המשחה ולקטרת הסמים

⁹ט ואבני שהם--ואבני מלאים לאפוד ולחשן

¹⁰י וכל חכם לב בכם יבאו ויעשו את כל אשר צוה יהוה

¹¹יא את המשכן--את אהלו ואת מכסהו את קרסיו ואת קרשיו את בריחו את עמדיו ואת אדניו

¹²יב את הארן ואת בדיו את הכפרת ואת פרכת המסך

¹³יג את השלחן ואת בדיו ואת כל כליו ואת לחם הפנים

¹⁴יד ואת מנרת המאור ואת כליה ואת נרתיה ואת שמן המאור

¹⁵טו ואת מזבח הקטרת ואת בדיו ואת שמן המשחה ואת קטרת הסמים ואת מסך הפתח לפתח המשכן

¹⁶טז את מזבח העלה ואת מכבר הנחשת אשר לו את בדיו ואת כל כליו את הכיר ואת כנו

¹⁷יז את קלעי החצר את עמדיו ואת אדניה ואת מסך שער החצר

¹⁸יח את יתדת המשכן ואת יתדת החצר ואת מיתריהם

¹⁹יט את בגדי השרד לשרת בקדש את בגדי הקדש לאהרן הכהן ואת בגדי בניו לכהן

²⁰כ ויצאו כל עדת בני ישראל מלפני משה

²¹כא ויבאו כל איש אשר נשאו לבו וכל אשר נדבה רוחו אתו הביאו את תרומת יהוה למלאכת אהל מועד ולכל עבדתו ולבגדי הקדש

²²כב ויבאו האנשים על הנשים כל נדיב לב הביאו חח ונזם וטבעת וכומז כל כלי זהב וכל איש אשר הניף תנופת זהב ליהוה

²³כג וכל איש אשר נמצא אתו תכלת וארגמן ותולעת שני--ושש ועזים וערת אילם מאדמים וערת תחשים הביאו

²⁴כד כל מרים תרומת כסף ונחשת הביאו את תרומת יהוה וכל אשר נמצא אתו עצי שטים לכל מלאכת העבדה--הביאו

²⁵כה וכל אשה חכמת לב בידיה טוו ויביאו מטוה את התכלת ואת הארגמן את תולעת השני ואת השש

²⁶כו וכל הנשים--אשר נשא לבן אתנה בחכמה טוו את העזים

²⁷כז והנשאם הביאו--את אבני השהם ואת אבני המלאים לאפוד ולחשן

²⁸כח ואת הבשם ואת השמן למאור--ולשמן המשחה ולקטרת הסמים

²⁹כט כל איש ואשה אשר נדב לבם אתם להביא לכל המלאכה אשר צוה יהוה לעשות ביד משה--הביאו בני ישראל נדבה ליהוה {פ}

³⁰ל ויאמר משה אל בני ישראל ראו קרא יהוה בשם בצלאל בן אורי בן חור למטה יהודה

³¹לא וימלא אתו רוח אלהים בחכמה בתבונה ובדעת ובכל מלאכה

³²לב ולחשב מחשבת--לעשת בזהב ובכסף ובנחשת

³³לג ובחרשת אבן למלאת ובחרשת עץ לעשות בכל מלאכת מחשבת

³⁴לד ולהורת נתן בלבו הוא ואהליאב בן אחיסמך למטה דן

³⁵לה מלא אתם חכמת לב לעשות כל מלאכת חרש וחשב ורקם בתכלת ובארגמן בתולעת השני ובשש וארג עשי כל מלאכה וחשבי מחשבת