Read כֶּתֶר אֲרָם צוֹבָא - Tanah Aleppo Codex שמות 36 Bible Online

שמות 36 - כֶּתֶר אֲרָם צוֹבָא - Tanah Aleppo Codex bible

שמות 36

¹א ועשה בצלאל ואהליאב וכל איש חכם לב אשר נתן יהוה חכמה ותבונה בהמה לדעת לעשת את כל מלאכת עבדת הקדש--לכל אשר צוה יהוה

²ב ויקרא משה אל בצלאל ואל אהליאב ואל כל איש חכם לב אשר נתן יהוה חכמה בלבו--כל אשר נשאו לבו לקרבה אל המלאכה לעשת אתה

³ג ויקחו מלפני משה את כל התרומה אשר הביאו בני ישראל למלאכת עבדת הקדש--לעשת אתה והם הביאו אליו עוד נדבה--בבקר בבקר

⁴ד ויבאו כל החכמים העשים את כל מלאכת הקדש--איש איש ממלאכתו אשר המה עשים

⁵ה ויאמרו אל משה לאמר מרבים העם להביא מדי העבדה למלאכה אשר צוה יהוה לעשת אתה

⁶ו ויצו משה ויעבירו קול במחנה לאמר איש ואשה אל יעשו עוד מלאכה לתרומת הקדש ויכלא העם מהביא

⁷ז והמלאכה היתה דים לכל המלאכה--לעשות אתה והותר {ס}

⁸ח ויעשו כל חכם לב בעשי המלאכה את המשכן--עשר יריעת שש משזר ותכלת וארגמן ותולעת שני--כרבים מעשה חשב עשה אתם

⁹ט ארך היריעה האחת שמנה ועשרים באמה ורחב ארבע באמה היריעה האחת מדה אחת לכל היריעת

¹⁰י ויחבר את חמש היריעת אחת אל אחת וחמש יריעת חבר אחת אל אחת

¹¹יא ויעש ללאת תכלת על שפת היריעה האחת מקצה במחברת כן עשה בשפת היריעה הקיצונה במחברת השנית

¹²יב חמשים ללאת עשה ביריעה האחת וחמשים ללאת עשה בקצה היריעה אשר במחברת השנית מקבילת הללאת--אחת אל אחת

¹³יג ויעש חמשים קרסי זהב ויחבר את היריעת אחת אל אחת בקרסים ויהי המשכן אחד {פ}

¹⁴יד ויעש יריעת עזים לאהל על המשכן עשתי עשרה יריעת עשה אתם

¹⁵טו ארך היריעה האחת שלשים באמה וארבע אמות רחב היריעה האחת מדה אחת לעשתי עשרה יריעת

¹⁶טז ויחבר את חמש היריעת לבד ואת שש היריעת לבד

¹⁷יז ויעש ללאת חמשים על שפת היריעה הקיצנה במחברת וחמשים ללאת עשה על שפת היריעה החברת השנית

¹⁸יח ויעש קרסי נחשת חמשים לחבר את האהל להית אחד

¹⁹יט ויעש מכסה לאהל ערת אילם מאדמים ומכסה ערת תחשים מלמעלה {ס}

²⁰כ ויעש את הקרשים למשכן עצי שטים עמדים

²¹כא עשר אמת ארך הקרש ואמה וחצי האמה רחב הקרש האחד

²²כב שתי ידת לקרש האחד משלבת אחת אל אחת כן עשה לכל קרשי המשכן

²³כג ויעש את הקרשים למשכן עשרים קרשים לפאת נגב תימנה

²⁴כד וארבעים אדני כסף--עשה תחת עשרים הקרשים שני אדנים תחת הקרש האחד לשתי ידתיו ושני אדנים תחת הקרש האחד לשתי ידתיו

²⁵כה ולצלע המשכן השנית לפאת צפון עשה עשרים קרשים

²⁶כו וארבעים אדניהם כסף--שני אדנים תחת הקרש האחד ושני אדנים תחת הקרש האחד

²⁷כז ולירכתי המשכן ימה עשה ששה קרשים

²⁸כח ושני קרשים עשה למקצעת המשכן--בירכתים

²⁹כט והיו תואמם מלמטה ויחדו יהיו תמים אל ראשו אל הטבעת האחת כן עשה לשניהם לשני המקצעת

³⁰ל והיו שמנה קרשים ואדניהם כסף ששה עשר אדנים--שני אדנים שני אדנים תחת הקרש האחד

³¹לא ויעש בריחי עצי שטים--חמשה לקרשי צלע המשכן האחת

³²לב וחמשה בריחם לקרשי צלע המשכן השנית וחמשה בריחם לקרשי המשכן לירכתים ימה

³³לג ויעש את הבריח התיכן לברח בתוך הקרשים מן הקצה אל הקצה

³⁴לד ואת הקרשים צפה זהב ואת טבעתם עשה זהב--בתים לבריחם ויצף את הבריחם זהב

³⁵לה ויעש את הפרכת תכלת וארגמן ותולעת שני ושש משזר מעשה חשב עשה אתה כרבים

³⁶לו ויעש לה ארבעה עמודי שטים ויצפם זהב וויהם זהב ויצק להם ארבעה אדני כסף

³⁷לז ויעש מסך לפתח האהל תכלת וארגמן ותולעת שני ושש משזר מעשה רקם

³⁸לח ואת עמודיו חמשה ואת וויהם וצפה ראשיהם וחשקיהם זהב ואדניהם חמשה נחשת {פ}