Read כֶּתֶר אֲרָם צוֹבָא - Tanah Aleppo Codex שמות 37 Bible Online

שמות 37 - כֶּתֶר אֲרָם צוֹבָא - Tanah Aleppo Codex bible

שמות 37

¹א ויעש בצלאל את הארן עצי שטים אמתים וחצי ארכו ואמה וחצי רחבו ואמה וחצי קמתו

²ב ויצפהו זהב טהור מבית ומחוץ ויעש לו זר זהב סביב

³ג ויצק לו ארבע טבעת זהב על ארבע פעמתיו ושתי טבעת על צלעו האחת ושתי טבעת על צלעו השנית

⁴ד ויעש בדי עצי שטים ויצף אתם זהב

⁵ה ויבא את הבדים בטבעת על צלעת הארן לשאת את הארן

⁶ו ויעש כפרת זהב טהור אמתים וחצי ארכה ואמה וחצי רחבה

⁷ז ויעש שני כרבים זהב מקשה עשה אתם משני קצות הכפרת

⁸ח כרוב אחד מקצה מזה וכרוב אחד מקצה מזה מן הכפרת עשה את הכרבים משני קצוותו (קצותיו)

⁹ט ויהיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת--היו פני הכרבים {פ}

¹⁰י ויעש את השלחן עצי שטים אמתים ארכו ואמה רחבו ואמה וחצי קמתו

¹¹יא ויצף אתו זהב טהור ויעש לו זר זהב סביב

¹²יב ויעש לו מסגרת טפח סביב ויעש זר זהב למסגרתו סביב

¹³יג ויצק לו ארבע טבעת זהב ויתן את הטבעת על ארבע הפאת אשר לארבע רגליו

¹⁴יד לעמת המסגרת היו הטבעת בתים לבדים לשאת את השלחן

¹⁵טו ויעש את הבדים עצי שטים ויצף אתם זהב לשאת את השלחן

¹⁶טז ויעש את הכלים אשר על השלחן את קערתיו ואת כפתיו ואת מנקיתיו ואת הקשות אשר יסך בהן--זהב טהור {פ}

¹⁷יז ויעש את המנרה זהב טהור מקשה עשה את המנרה ירכה וקנה--גביעיה כפתריה ופרחיה ממנה היו

¹⁸יח וששה קנים יצאים מצדיה שלשה קני מנרה מצדה האחד ושלשה קני מנרה מצדה השני

¹⁹יט שלשה גבעים משקדים בקנה האחד כפתר ופרח ושלשה גבעים משקדים בקנה אחד כפתר ופרח כן לששת הקנים היצאים מן המנרה

²⁰כ ובמנרה ארבעה גבעים משקדים--כפתריה ופרחיה

²¹כא וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה--לששת הקנים היצאים ממנה

²²כב כפתריהם וקנתם ממנה היו כלה מקשה אחת זהב טהור

²³כג ויעש את נרתיה שבעה ומלקחיה ומחתתיה זהב טהור

²⁴כד ככר זהב טהור עשה אתה ואת כל כליה {פ}

²⁵כה ויעש את מזבח הקטרת עצי שטים אמה ארכו ואמה רחבו רבוע ואמתים קמתו--ממנו היו קרנתיו

²⁶כו ויצף אתו זהב טהור את גגו ואת קירתיו סביב--ואת קרנתיו ויעש לו זר זהב סביב

²⁷כז ושתי טבעת זהב עשה לו מתחת לזרו על שתי צלעתיו על שני צדיו--לבתים לבדים לשאת אתו בהם

²⁸כח ויעש את הבדים עצי שטים ויצף אתם זהב

²⁹כט ויעש את שמן המשחה קדש ואת קטרת הסמים טהור--מעשה רקח {ס}