Read כֶּתֶר אֲרָם צוֹבָא - Tanah Aleppo Codex שמות 38 Bible Online

שמות 38 - כֶּתֶר אֲרָם צוֹבָא - Tanah Aleppo Codex bible

שמות 38

¹א ויעש את מזבח העלה עצי שטים חמש אמות ארכו וחמש אמות רחבו רבוע ושלש אמות קמתו

²ב ויעש קרנתיו על ארבע פנתיו--ממנו היו קרנתיו ויצף אתו נחשת

³ג ויעש את כל כלי המזבח את הסירת ואת היעים ואת המזרקת את המזלגת ואת המחתת כל כליו עשה נחשת

⁴ד ויעש למזבח מכבר מעשה רשת נחשת תחת כרכבו מלמטה עד חציו

⁵ה ויצק ארבע טבעת בארבע הקצות--למכבר הנחשת בתים לבדים

⁶ו ויעש את הבדים עצי שטים ויצף אתם נחשת

⁷ז ויבא את הבדים בטבעת על צלעת המזבח לשאת אתו בהם נבוב לחת עשה אתו {ס}

⁸ח ויעש את הכיור נחשת ואת כנו נחשת--במראת הצבאת אשר צבאו פתח אהל מועד {ס}

⁹ט ויעש את החצר לפאת נגב תימנה קלעי החצר שש משזר מאה באמה

¹⁰י עמודיהם עשרים ואדניהם עשרים נחשת ווי העמודים וחשקיהם כסף

¹¹יא ולפאת צפון מאה באמה--עמודיהם עשרים ואדניהם עשרים נחשת ווי העמודים וחשקיהם כסף

¹²יב ולפאת ים קלעים חמשים באמה--עמודיהם עשרה ואדניהם עשרה ווי העמדים וחשוקיהם כסף

¹³יג ולפאת קדמה מזרחה חמשים אמה

¹⁴יד קלעים חמש עשרה אמה אל הכתף עמודיהם שלשה ואדניהם שלשה

¹⁵טו ולכתף השנית מזה ומזה לשער החצר קלעים חמש עשרה אמה עמדיהם שלשה ואדניהם שלשה

¹⁶טז כל קלעי החצר סביב שש משזר

¹⁷יז והאדנים לעמדים נחשת ווי העמודים וחשוקיהם כסף וצפוי ראשיהם כסף והם מחשקים כסף כל עמדי החצר

¹⁸יח ומסך שער החצר מעשה רקם--תכלת וארגמן ותולעת שני ושש משזר ועשרים אמה ארך וקומה ברחב חמש אמות לעמת קלעי החצר

¹⁹יט ועמדיהם ארבעה ואדניהם ארבעה נחשת וויהם כסף וצפוי ראשיהם וחשקיהם כסף

²⁰כ וכל היתדת למשכן ולחצר סביב--נחשת {ס}

²¹כא אלה פקודי המשכן משכן העדת אשר פקד על פי משה עבדת הלוים ביד איתמר בן אהרן הכהן

²²כב ובצלאל בן אורי בן חור למטה יהודה עשה את כל אשר צוה יהוה את משה

²³כג ואתו אהליאב בן אחיסמך למטה דן--חרש וחשב ורקם בתכלת ובארגמן ובתולעת השני ובשש {ס}

²⁴כד כל הזהב העשוי למלאכה בכל מלאכת הקדש--ויהי זהב התנופה תשע ועשרים ככר ושבע מאות ושלשים שקל בשקל הקדש

²⁵כה וכסף פקודי העדה מאת ככר ואלף ושבע מאות וחמשה ושבעים שקל--בשקל הקדש

²⁶כו בקע לגלגלת מחצית השקל בשקל הקדש--לכל העבר על הפקדים מבן עשרים שנה ומעלה לשש מאות אלף ושלשת אלפים וחמש מאות וחמשים

²⁷כז ויהי מאת ככר הכסף לצקת את אדני הקדש ואת אדני הפרכת מאת אדנים למאת הככר ככר לאדן

²⁸כח ואת האלף ושבע המאות וחמשה ושבעים עשה ווים לעמודים וצפה ראשיהם וחשק אתם

²⁹כט ונחשת התנופה שבעים ככר ואלפים וארבע מאות שקל

³⁰ל ויעש בה את אדני פתח אהל מועד ואת מזבח הנחשת ואת מכבר הנחשת אשר לו ואת כל כלי המזבח

³¹לא ואת אדני החצר סביב ואת אדני שער החצר ואת כל יתדת המשכן ואת כל יתדת החצר סביב