Read כֶּתֶר אֲרָם צוֹבָא - Tanah Aleppo Codex שמות 39 Bible Online

שמות 39 - כֶּתֶר אֲרָם צוֹבָא - Tanah Aleppo Codex bible

שמות 39

¹א ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה {פ}

²ב ויעש את האפד זהב תכלת וארגמן ותולעת שני--ושש משזר

³ג וירקעו את פחי הזהב וקצץ פתילם לעשות בתוך התכלת ובתוך הארגמן ובתוך תולעת השני ובתוך השש--מעשה חשב

⁴ד כתפת עשו לו חברת--על שני קצוותו (קצותיו) חבר

⁵ה וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר--כאשר צוה יהוה את משה {ס}

⁶ו ויעשו את אבני השהם מסבת משבצת זהב מפתחת פתוחי חותם על שמות בני ישראל

⁷ז וישם אתם על כתפת האפד--אבני זכרון לבני ישראל כאשר צוה יהוה את משה {פ}

⁸ח ויעש את החשן מעשה חשב כמעשה אפד זהב תכלת וארגמן ותולעת שני--ושש משזר

⁹ט רבוע היה כפול עשו את החשן--זרת ארכו וזרת רחבו כפול

¹⁰י וימלאו בו--ארבעה טורי אבן טור אדם פטדה וברקת--הטור האחד

¹¹יא והטור השני--נפך ספיר ויהלם

¹²יב והטור השלישי--לשם שבו ואחלמה

¹³יג והטור הרביעי--תרשיש שהם וישפה מוסבת משבצת זהב במלאתם

¹⁴יד והאבנים על שמת בני ישראל הנה שתים עשרה--על שמתם פתוחי חתם איש על שמו לשנים עשר שבט

¹⁵טו ויעשו על החשן שרשרת גבלת מעשה עבת זהב טהור

¹⁶טז ויעשו שתי משבצת זהב ושתי טבעת זהב ויתנו את שתי הטבעת על שני קצות החשן

¹⁷יז ויתנו שתי העבתת הזהב על שתי הטבעת--על קצות החשן

¹⁸יח ואת שתי קצות שתי העבתת נתנו על שתי המשבצת ויתנם על כתפת האפד אל מול פניו

¹⁹יט ויעשו שתי טבעת זהב וישימו על שני קצות החשן על שפתו--אשר אל עבר האפד ביתה

²⁰כ ויעשו שתי טבעת זהב ויתנם על שתי כתפת האפד מלמטה ממול פניו לעמת מחברתו--ממעל לחשב האפד

²¹כא וירכסו את החשן מטבעתיו אל טבעת האפד בפתיל תכלת להית על חשב האפד ולא יזח החשן מעל האפד--כאשר צוה יהוה את משה {פ}

²²כב ויעש את מעיל האפד מעשה ארג כליל תכלת

²³כג ופי המעיל בתוכו כפי תחרא שפה לפיו סביב לא יקרע

²⁴כד ויעשו על שולי המעיל רמוני תכלת וארגמן ותולעת שני--משזר

²⁵כה ויעשו פעמני זהב טהור ויתנו את הפעמנים בתוך הרמנים על שולי המעיל סביב--בתוך הרמנים

²⁶כו פעמן ורמן פעמן ורמן על שולי המעיל סביב לשרת כאשר צוה יהוה את משה {ס}

²⁷כז ויעשו את הכתנת שש מעשה ארג לאהרן ולבניו

²⁸כח ואת המצנפת שש ואת פארי המגבעת שש ואת מכנסי הבד שש משזר

²⁹כט ואת האבנט שש משזר ותכלת וארגמן ותולעת שני--מעשה רקם כאשר צוה יהוה את משה {ס}

³⁰ל ויעשו את ציץ נזר הקדש זהב טהור ויכתבו עליו מכתב פתוחי חותם--קדש ליהוה

³¹לא ויתנו עליו פתיל תכלת לתת על המצנפת מלמעלה כאשר צוה יהוה את משה {ס}

³²לב ותכל--כל עבדת משכן אהל מועד ויעשו בני ישראל--ככל אשר צוה יהוה את משה כן עשו {פ}

³³לג ויביאו את המשכן אל משה את האהל ואת כל כליו קרסיו קרשיו בריחו ועמדיו ואדניו

³⁴לד ואת מכסה עורת האילם המאדמים ואת מכסה ערת התחשים ואת פרכת המסך

³⁵לה את ארון העדת ואת בדיו ואת הכפרת

³⁶לו את השלחן את כל כליו ואת לחם הפנים

³⁷לז את המנרה הטהרה את נרתיה נרת המערכה--ואת כל כליה ואת שמן המאור

³⁸לח ואת מזבח הזהב ואת שמן המשחה ואת קטרת הסמים ואת מסך פתח האהל

³⁹לט את מזבח הנחשת ואת מכבר הנחשת אשר לו את בדיו ואת כל כליו את הכיר ואת כנו

⁴⁰מ את קלעי החצר את עמדיה ואת אדניה ואת המסך לשער החצר את מיתריו ויתדתיה ואת כל כלי עבדת המשכן--לאהל מועד

⁴¹מא את בגדי השרד לשרת בקדש את בגדי הקדש לאהרן הכהן ואת בגדי בניו לכהן

⁴²מב ככל אשר צוה יהוה את משה כן עשו בני ישראל את כל העבדה

⁴³מג וירא משה את כל המלאכה והנה עשו אתה--כאשר צוה יהוה כן עשו ויברך אתם משה {פ}