Read כֶּתֶר אֲרָם צוֹבָא - Tanah Aleppo Codex שמות 40 Bible Online

שמות 40 - כֶּתֶר אֲרָם צוֹבָא - Tanah Aleppo Codex bible

שמות 40

¹א וידבר יהוה אל משה לאמר

²ב ביום החדש הראשון באחד לחדש תקים את משכן אהל מועד

³ג ושמת שם את ארון העדות וסכת על הארן את הפרכת

⁴ד והבאת את השלחן וערכת את ערכו והבאת את המנרה והעלית את נרתיה

⁵ה ונתתה את מזבח הזהב לקטרת לפני ארון העדת ושמת את מסך הפתח למשכן

⁶ו ונתתה את מזבח העלה לפני פתח משכן אהל מועד

⁷ז ונתת את הכיר בין אהל מועד ובין המזבח ונתת שם מים

⁸ח ושמת את החצר סביב ונתת את מסך שער החצר

⁹ט ולקחת את שמן המשחה ומשחת את המשכן ואת כל אשר בו וקדשת אתו ואת כל כליו והיה קדש

¹⁰י ומשחת את מזבח העלה ואת כל כליו וקדשת את המזבח והיה המזבח קדש קדשים

¹¹יא ומשחת את הכיר ואת כנו וקדשת אתו

¹²יב והקרבת את אהרן ואת בניו אל פתח אהל מועד ורחצת אתם במים

¹³יג והלבשת את אהרן את בגדי הקדש ומשחת אתו וקדשת אתו וכהן לי

¹⁴יד ואת בניו תקריב והלבשת אתם כתנת

¹⁵טו ומשחת אתם כאשר משחת את אביהם וכהנו לי והיתה להית להם משחתם לכהנת עולם--לדרתם

¹⁶טז ויעש משה ככל אשר צוה יהוה אתו--כן עשה {ס}

¹⁷יז ויהי בחדש הראשון בשנה השנית--באחד לחדש הוקם המשכן

¹⁸יח ויקם משה את המשכן ויתן את אדניו וישם את קרשיו ויתן את בריחיו ויקם את עמודיו

¹⁹יט ויפרש את האהל על המשכן וישם את מכסה האהל עליו מלמעלה--כאשר צוה יהוה את משה {ס}

²⁰כ ויקח ויתן את העדת אל הארן וישם את הבדים על הארן ויתן את הכפרת על הארן מלמעלה

²¹כא ויבא את הארן אל המשכן וישם את פרכת המסך ויסך על ארון העדות--כאשר צוה יהוה את משה {ס}

²²כב ויתן את השלחן באהל מועד על ירך המשכן צפנה מחוץ לפרכת

²³כג ויערך עליו ערך לחם לפני יהוה--כאשר צוה יהוה את משה {ס}

²⁴כד וישם את המנרה באהל מועד נכח השלחן על ירך המשכן נגבה

²⁵כה ויעל הנרת לפני יהוה--כאשר צוה יהוה את משה {ס}

²⁶כו וישם את מזבח הזהב באהל מועד לפני הפרכת

²⁷כז ויקטר עליו קטרת סמים--כאשר צוה יהוה את משה {ס}

²⁸כח וישם את מסך הפתח למשכן

²⁹כט ואת מזבח העלה שם פתח משכן אהל מועד ויעל עליו את העלה ואת המנחה--כאשר צוה יהוה את משה {ס}

³⁰ל וישם את הכיר בין אהל מועד ובין המזבח ויתן שמה מים לרחצה

³¹לא ורחצו ממנו משה ואהרן ובניו את ידיהם ואת רגליהם

³²לב בבאם אל אהל מועד ובקרבתם אל המזבח--ירחצו כאשר צוה יהוה את משה {ס}

³³לג ויקם את החצר סביב למשכן ולמזבח ויתן את מסך שער החצר ויכל משה את המלאכה {פ}

³⁴לד ויכס הענן את אהל מועד וכבוד יהוה מלא את המשכן

³⁵לה ולא יכל משה לבוא אל אהל מועד--כי שכן עליו הענן וכבוד יהוה מלא את המשכן

³⁶לו ובהעלות הענן מעל המשכן יסעו בני ישראל בכל מסעיהם

³⁷לז ואם לא יעלה הענן--ולא יסעו עד יום העלתו

³⁸לח כי ענן יהוה על המשכן יומם ואש תהיה לילה בו--לעיני כל בית ישראל בכל מסעיהם {ש}