Read כֶּתֶר אֲרָם צוֹבָא - Tanah Aleppo Codex שמות 5 Bible Online

שמות 5 - כֶּתֶר אֲרָם צוֹבָא - Tanah Aleppo Codex bible

שמות 5

¹א ואחר באו משה ואהרן ויאמרו אל פרעה כה אמר יהוה אלהי ישראל שלח את עמי ויחגו לי במדבר

²ב ויאמר פרעה--מי יהוה אשר אשמע בקלו לשלח את ישראל לא ידעתי את יהוה וגם את ישראל לא אשלח

³ג ויאמרו אלהי העברים נקרא עלינו נלכה נא דרך שלשת ימים במדבר ונזבחה ליהוה אלהינו--פן יפגענו בדבר או בחרב

⁴ד ויאמר אלהם מלך מצרים למה משה ואהרן תפריעו את העם ממעשיו לכו לסבלתיכם

⁵ה ויאמר פרעה הן רבים עתה עם הארץ והשבתם אתם מסבלתם

⁶ו ויצו פרעה ביום ההוא את הנגשים בעם ואת שטריו לאמר

⁷ז לא תאספון לתת תבן לעם ללבן הלבנים--כתמול שלשם הם ילכו וקששו להם תבן

⁸ח ואת מתכנת הלבנים אשר הם עשים תמול שלשם תשימו עליהם--לא תגרעו ממנו כי נרפים הם--על כן הם צעקים לאמר נלכה נזבחה לאלהינו

⁹ט תכבד העבדה על האנשים ויעשו בה ואל ישעו בדברי שקר

¹⁰י ויצאו נגשי העם ושטריו ויאמרו אל העם לאמר כה אמר פרעה אינני נתן לכם תבן

¹¹יא אתם לכו קחו לכם תבן מאשר תמצאו כי אין נגרע מעבדתכם דבר

¹²יב ויפץ העם בכל ארץ מצרים לקשש קש לתבן

¹³יג והנגשים אצים לאמר כלו מעשיכם דבר יום ביומו כאשר בהיות התבן

¹⁴יד ויכו שטרי בני ישראל אשר שמו עלהם נגשי פרעה לאמר מדוע לא כליתם חקכם ללבן כתמול שלשם--גם תמול גם היום

¹⁵טו ויבאו שטרי בני ישראל ויצעקו אל פרעה לאמר למה תעשה כה לעבדיך

¹⁶טז תבן אין נתן לעבדיך ולבנים אמרים לנו עשו והנה עבדיך מכים וחטאת עמך

¹⁷יז ויאמר נרפים אתם נרפים על כן אתם אמרים נלכה נזבחה ליהוה

¹⁸יח ועתה לכו עבדו ותבן לא ינתן לכם ותכן לבנים תתנו

¹⁹יט ויראו שטרי בני ישראל אתם--ברע לאמר לא תגרעו מלבניכם דבר יום ביומו

²⁰כ ויפגעו את משה ואת אהרן נצבים לקראתם בצאתם מאת פרעה

²¹כא ויאמרו אלהם ירא יהוה עליכם וישפט אשר הבאשתם את ריחנו בעיני פרעה ובעיני עבדיו לתת חרב בידם להרגנו

²²כב וישב משה אל יהוה ויאמר אדני למה הרעתה לעם הזה--למה זה שלחתני

²³כג ומאז באתי אל פרעה לדבר בשמך הרע לעם הזה והצל לא הצלת את עמך