Read כֶּתֶר אֲרָם צוֹבָא - Tanah Aleppo Codex איוב 1 Bible Online

איוב 1 - כֶּתֶר אֲרָם צוֹבָא - Tanah Aleppo Codex bible

איוב 1

¹א איש היה בארץ עוץ איוב שמו והיה האיש ההוא תם וישר וירא אלהים--וסר מרע

²ב ויולדו לו שבעה בנים ושלוש בנות

³ג ויהי מקנהו שבעת אלפי צאן ושלשת אלפי גמלים וחמש מאות צמד בקר וחמש מאות אתונות ועבדה רבה מאד ויהי האיש ההוא גדול מכל בני קדם

⁴ד והלכו בניו ועשו משתה בית איש יומו ושלחו וקראו לשלשת אחיתיהם לאכל ולשתות עמהם

⁵ה ויהי כי הקיפו ימי המשתה וישלח איוב ויקדשם והשכים בבקר והעלה עלות מספר כלם--כי אמר איוב אולי חטאו בני וברכו אלהים בלבבם ככה יעשה איוב כל הימים {פ}

⁶ו ויהי היום--ויבאו בני האלהים להתיצב על יהוה ויבוא גם השטן בתוכם

⁷ז ויאמר יהוה אל השטן מאין תבא ויען השטן את יהוה ויאמר משוט בארץ ומהתהלך בה

⁸ח ויאמר יהוה אל השטן השמת לבך על עבדי איוב כי אין כמהו בארץ איש תם וישר ירא אלהים וסר מרע

⁹ט ויען השטן את יהוה ויאמר החנם ירא איוב אלהים

¹⁰י הלא את (אתה) שכת בעדו ובעד ביתו ובעד כל אשר לו--מסביב מעשה ידיו ברכת ומקנהו פרץ בארץ

¹¹יא ואולם שלח נא ידך וגע בכל אשר לו--אם לא על פניך יברכך

¹²יב ויאמר יהוה אל השטן הנה כל אשר לו בידך--רק אליו אל תשלח ידך ויצא השטן מעם פני יהוה

¹³יג ויהי היום ובניו ובנתיו אכלים ושתים יין בבית אחיהם הבכור

¹⁴יד ומלאך בא אל איוב ויאמר הבקר היו חרשות והאתנות רעות על ידיהם

¹⁵טו ותפל שבא ותקחם ואת הנערים הכו לפי חרב ואמלטה רק אני לבדי להגיד לך

¹⁶טז עוד זה מדבר וזה בא ויאמר אש אלהים נפלה מן השמים ותבער בצאן ובנערים ותאכלם ואמלטה רק אני לבדי להגיד לך

¹⁷יז עוד זה מדבר וזה בא ויאמר כשדים שמו שלשה ראשים ויפשטו על הגמלים ויקחום ואת הנערים הכו לפי חרב ואמלטה רק אני לבדי להגיד לך

¹⁸יח עד זה מדבר וזה בא ויאמר בניך ובנותיך אכלים ושתים יין בבית אחיהם הבכור

¹⁹יט והנה רוח גדולה באה מעבר המדבר ויגע בארבע פנות הבית ויפל על הנערים וימותו ואמלטה רק אני לבדי להגיד לך

²⁰כ ויקם איוב ויקרע את מעלו ויגז את ראשו ויפל ארצה וישתחו

²¹כא ויאמר ערם יצתי מבטן אמי וערם אשוב שמה--יהוה נתן ויהוה לקח יהי שם יהוה מברך

²²כב בכל זאת לא חטא איוב ולא נתן תפלה לאלהים {פ}