Read כֶּתֶר אֲרָם צוֹבָא - Tanah Aleppo Codex איוב 10 Bible Online

איוב 10 - כֶּתֶר אֲרָם צוֹבָא - Tanah Aleppo Codex bible

איוב 10

¹א נקטה נפשי בחיי אעזבה עלי שיחי אדברה במר נפשי

²ב אמר אל-אלוה אל-תרשיעני הודיעני על מה-תריבני

³ג הטוב לך כי תעשק--כי-תמאס יגיע כפיך ועל-עצת רשעים הופעת

⁴ד העיני בשר לך אם-כראות אנוש תראה

⁵ה הכימי אנוש ימיך אם-שנותיך כימי גבר

⁶ו כי-תבקש לעוני ולחטאתי תדרוש

⁷ז על-דעתך כי-לא ארשע ואין מידך מציל

⁸ח ידיך עצבוני ויעשוני יחד סביב ותבלעני

⁹ט זכר-נא כי-כחמר עשיתני ואל-עפר תשיבני

¹⁰י הלא כחלב תתיכני וכגבנה תקפיאני

¹¹יא עור ובשר תלבישני ובעצמות וגידים תשככני

¹²יב חיים וחסד עשית עמדי ופקדתך שמרה רוחי

¹³יג ואלה צפנת בלבבך ידעתי כי-זאת עמך

¹⁴יד אם-חטאתי ושמרתני ומעוני לא תנקני

¹⁵טו אם רשעתי אללי לי-- וצדקתי לא-אשא ראשי שבע קלון וראה עניי

¹⁶טז ויגאה כשחל תצודני ותשב תתפלא-בי

¹⁷יז תחדש עדיך נגדי ותרב כעשך עמדי חליפות וצבא עמי

¹⁸יח ולמה מרחם הצאתני אגוע ועין לא-תראני

¹⁹יט כאשר לא-הייתי אהיה מבטן לקבר אובל

²⁰כ הלא-מעט ימי יחדל (וחדל) ישית (ושית) ממני ואבליגה מעט

²¹כא בטרם אלך ולא אשוב-- אל-ארץ חשך וצלמות

²²כב ארץ עפתה כמו אפל--צלמות ולא סדרים ותפע כמו-אפל