Read כֶּתֶר אֲרָם צוֹבָא - Tanah Aleppo Codex איוב 11 Bible Online

איוב 11 - כֶּתֶר אֲרָם צוֹבָא - Tanah Aleppo Codex bible

איוב 11

¹א ויען צפר הנעמתי ויאמר

²ב הרב דברים לא יענה ואם-איש שפתים יצדק

³ג בדיך מתים יחרישו ותלעג ואין מכלם

⁴ד ותאמר זך לקחי ובר הייתי בעיניך

⁵ה ואולם--מי יתן אלוה דבר ויפתח שפתיו עמך

⁶ו ויגד-לך תעלמות חכמה-- כי-כפלים לתושיה ודע-- כי-ישה לך אלוה מעונך

⁷ז החקר אלוה תמצא אם עד-תכלית שדי תמצא

⁸ח גבהי שמים מה-תפעל עמקה משאול מה-תדע

⁹ט ארכה מארץ מדה ורחבה מני-ים

¹⁰י אם-יחלף ויסגיר ויקהיל ומי ישיבנו

¹¹יא כי-הוא ידע מתי-שוא וירא-און ולא יתבונן

¹²יב ואיש נבוב ילבב ועיר פרא אדם יולד

¹³יג אם-אתה הכינות לבך ופרשת אליו כפיך

¹⁴יד אם-און בידך הרחיקהו ואל-תשכן באהליך עולה

¹⁵טו כי-אז תשא פניך ממום והיית מצק ולא תירא

¹⁶טז כי-אתה עמל תשכח כמים עברו תזכר

¹⁷יז ומצהרים יקום חלד תעפה כבקר תהיה

¹⁸יח ובטחת כי-יש תקוה וחפרת לבטח תשכב

¹⁹יט ורבצת ואין מחריד וחלו פניך רבים

²⁰כ ועיני רשעים תכלינה ומנוס אבד מנהם ותקותם מפח-נפש