Read כֶּתֶר אֲרָם צוֹבָא - Tanah Aleppo Codex איוב 12 Bible Online

איוב 12 - כֶּתֶר אֲרָם צוֹבָא - Tanah Aleppo Codex bible

איוב 12

¹א ויען איוב ויאמר

²ב אמנם כי אתם-עם ועמכם תמות חכמה

³ג גם-לי לבב כמוכם--לא-נפל אנכי מכם ואת-מי-אין כמו-אלה

⁴ד שחק לרעהו אהיה--קרא לאלוה ויענהו שחוק צדיק תמים

⁵ה לפיד בוז לעשתות שאנן-- נכון למועדי רגל

⁶ו ישליו אהלים לשדדים ובטחות למרגיזי אל-- לאשר הביא אלוה בידו

⁷ז ואולם--שאל-נא בהמות ותרך ועוף השמים ויגד-לך

⁸ח או שיח לארץ ותרך ויספרו לך דגי הים

⁹ט מי לא-ידע בכל-אלה כי יד-יהוה עשתה זאת

¹⁰י אשר בידו נפש כל-חי ורוח כל-בשר-איש

¹¹יא הלא-אזן מלין תבחן וחך אכל יטעם-לו

¹²יב בישישים חכמה וארך ימים תבונה

¹³יג עמו חכמה וגבורה לו עצה ותבונה

¹⁴יד הן יהרוס ולא יבנה יסגר על-איש ולא יפתח

¹⁵טו הן יעצר במים ויבשו וישלחם ויהפכו ארץ

¹⁶טז עמו עז ותושיה לו שגג ומשגה

¹⁷יז מוליך יועצים שולל ושפטים יהולל

¹⁸יח מוסר מלכים פתח ויאסר אזור במתניהם

¹⁹יט מוליך כהנים שולל ואתנים יסלף

²⁰כ מסיר שפה לנאמנים וטעם זקנים יקח

²¹כא שופך בוז על-נדיבים ומזיח אפיקים רפה

²²כב מגלה עמקות מני-חשך ויצא לאור צלמות

²³כג משגיא לגוים ויאבדם שטח לגוים וינחם

²⁴כד מסיר--לב ראשי עם-הארץ ויתעם בתהו לא-דרך

²⁵כה ימששו-חשך ולא-אור ויתעם כשכור