Read כֶּתֶר אֲרָם צוֹבָא - Tanah Aleppo Codex איוב 13 Bible Online

איוב 13 - כֶּתֶר אֲרָם צוֹבָא - Tanah Aleppo Codex bible

איוב 13

¹א הן-כל ראתה עיני שמעה אזני ותבן לה

²ב כדעתכם ידעתי גם-אני לא-נפל אנכי מכם

³ג אולם--אני אל-שדי אדבר והוכח אל-אל אחפץ

⁴ד ואולם אתם טפלי-שקר רפאי אלל כלכם

⁵ה מי-יתן החרש תחרישון ותהי לכם לחכמה

⁶ו שמעו-נא תוכחתי ורבות שפתי הקשיבו

⁷ז הלאל תדברו עולה ולו תדברו רמיה

⁸ח הפניו תשאון אם-לאל תריבון

⁹ט הטוב כי-יחקר אתכם אם-כהתל באנוש תהתלו בו

¹⁰י הוכח יוכיח אתכם-- אם-בסתר פנים תשאון

¹¹יא הלא שאתו תבעת אתכם ופחדו יפל עליכם

¹²יב זכרניכם משלי-אפר לגבי-חמר גביכם

¹³יג החרישו ממני ואדברה-אני ויעבר עלי מה

¹⁴יד על-מה אשא בשרי בשני ונפשי אשים בכפי

¹⁵טו הן יקטלני לא (לו) איחל אך-דרכי אל-פניו אוכיח

¹⁶טז גם-הוא-לי לישועה כי-לא לפניו חנף יבוא

¹⁷יז שמעו שמוע מלתי ואחותי באזניכם

¹⁸יח הנה-נא ערכתי משפט ידעתי כי-אני אצדק

¹⁹יט מי-הוא יריב עמדי כי-עתה אחריש ואגוע

²⁰כ אך-שתים אל-תעש עמדי אז מפניך לא אסתר

²¹כא כפך מעלי הרחק ואמתך אל-תבעתני

²²כב וקרא ואנכי אענה או-אדבר והשיבני

²³כג כמה לי עונות וחטאות-- פשעי וחטאתי הדיעני

²⁴כד למה-פניך תסתיר ותחשבני לאויב לך

²⁵כה העלה נדף תערוץ ואת-קש יבש תרדף

²⁶כו כי-תכתב עלי מררות ותורישני עונות נעורי

²⁷כז ותשם בסד רגלי-- ותשמור כל-ארחתי על-שרשי רגלי תתחקה

²⁸כח והוא כרקב יבלה כבגד אכלו עש