Read כֶּתֶר אֲרָם צוֹבָא - Tanah Aleppo Codex איוב 15 Bible Online

איוב 15 - כֶּתֶר אֲרָם צוֹבָא - Tanah Aleppo Codex bible

איוב 15

¹א ויען אליפז התימני ויאמר

²ב החכם יענה דעת-רוח וימלא קדים בטנו

³ג הוכח בדבר לא-יסכון ומלים לא-יועיל בם

⁴ד אף-אתה תפר יראה ותגרע שיחה לפני-אל

⁵ה כי יאלף עונך פיך ותבחר לשון ערומים

⁶ו ירשיעך פיך ולא-אני ושפתיך יענו-בך

⁷ז הראישון אדם תולד ולפני גבעות חוללת

⁸ח הבסוד אלוה תשמע ותגרע אליך חכמה

⁹ט מה-ידעת ולא נדע תבין ולא-עמנו הוא

¹⁰י גם-שב גם-ישיש בנו-- כביר מאביך ימים

¹¹יא המעט ממך תנחומות אל ודבר לאט עמך

¹²יב מה-יקחך לבך ומה-ירזמון עיניך

¹³יג כי-תשיב אל-אל רוחך והצאת מפיך מלין

¹⁴יד מה-אנוש כי-יזכה וכי-יצדק ילוד אשה

¹⁵טו הן בקדשו לא יאמין ושמים לא-זכו בעיניו

¹⁶טז אף כי-נתעב ונאלח איש-שתה כמים עולה

¹⁷יז אחוך שמע-לי וזה-חזיתי ואספרה

¹⁸יח אשר-חכמים יגידו ולא כחדו מאבותם

¹⁹יט להם לבדם נתנה הארץ ולא-עבר זר בתוכם

²⁰כ כל-ימי רשע הוא מתחולל ומספר שנים נצפנו לעריץ

²¹כא קול-פחדים באזניו בשלום שודד יבואנו

²²כב לא-יאמין שוב מני-חשך וצפו (וצפוי) הוא אלי-חרב

²³כג נדד הוא ללחם איה ידע כי-נכון בידו יום-חשך

²⁴כד יבעתהו צר ומצוקה תתקפהו כמלך עתיד לכידור

²⁵כה כי-נטה אל-אל ידו ואל-שדי יתגבר

²⁶כו ירוץ אליו בצואר בעבי גבי מגניו

²⁷כז כי-כסה פניו בחלבו ויעש פימה עלי-כסל

²⁸כח וישכון ערים נכחדות--בתים לא-ישבו למו אשר התעתדו לגלים

²⁹כט לא-יעשר ולא-יקום חילו ולא-יטה לארץ מנלם

³⁰ל לא-יסור מני-חשך--ינקתו תיבש שלהבת ויסור ברוח פיו

³¹לא אל-יאמן בשו נתעה כי-שוא תהיה תמורתו

³²לב בלא-יומו תמלא וכפתו לא רעננה

³³לג יחמס כגפן בסרו וישלך כזית נצתו

³⁴לד כי-עדת חנף גלמוד ואש אכלה אהלי-שחד

³⁵לה הרה עמל וילד און ובטנם תכין מרמה