Read כֶּתֶר אֲרָם צוֹבָא - Tanah Aleppo Codex איוב 16 Bible Online

איוב 16 - כֶּתֶר אֲרָם צוֹבָא - Tanah Aleppo Codex bible

איוב 16

¹א ויען איוב ויאמר

²ב שמעתי כאלה רבות מנחמי עמל כלכם

³ג הקץ לדברי-רוח או מה-ימריצך כי תענה

⁴ד גם אנכי-- ככם אדברה לו יש נפשכם תחת נפשי-- אחבירה עליכם במלים ואניעה עליכם במו ראשי

⁵ה אאמצכם במו-פי וניד שפתי יחשך

⁶ו אם-אדברה לא-יחשך כאבי ואחדלה מה-מני יהלך

⁷ז אך-עתה הלאני השמות כל-עדתי

⁸ח ותקמטני לעד היה ויקם בי כחשי בפני יענה

⁹ט אפו טרף וישטמני--חרק עלי בשניו צרי ילטש עיניו לי

¹⁰י פערו עלי בפיהם--בחרפה הכו לחיי יחד עלי יתמלאון

¹¹יא יסגירני אל אל עויל ועל-ידי רשעים ירטני

¹²יב שלו הייתי ויפרפרני-- ואחז בערפי ויפצפצני ויקימני לו למטרה

¹³יג יסבו עלי רביו-- יפלח כליותי ולא יחמל ישפך לארץ מררתי

¹⁴יד יפרצני פרץ על-פני-פרץ ירץ עלי כגבור

¹⁵טו שק תפרתי עלי גלדי ועללתי בעפר קרני

¹⁶טז פני חמרמרה (חמרמרו) מני-בכי ועל עפעפי צלמות

¹⁷יז על לא-חמס בכפי ותפלתי זכה

¹⁸יח ארץ אל-תכסי דמי ואל-יהי מקום לזעקתי

¹⁹יט גם-עתה הנה-בשמים עדי ושהדי במרמים

²⁰כ מליצי רעי אל-אלוה דלפה עיני

²¹כא ויוכח לגבר עם-אלוה ובן-אדם לרעהו

²²כב כי-שנות מספר יאתיו וארח לא-אשוב אהלך