Read כֶּתֶר אֲרָם צוֹבָא - Tanah Aleppo Codex איוב 2 Bible Online

איוב 2 - כֶּתֶר אֲרָם צוֹבָא - Tanah Aleppo Codex bible

איוב 2

¹א ויהי היום--ויבאו בני האלהים להתיצב על יהוה ויבוא גם השטן בתכם להתיצב על יהוה

²ב ויאמר יהוה אל השטן אי מזה תבא ויען השטן את יהוה ויאמר משט בארץ ומהתהלך בה

³ג ויאמר יהוה אל השטן השמת לבך אל עבדי איוב--כי אין כמהו בארץ איש תם וישר ירא אלהים וסר מרע ועדנו מחזיק בתמתו ותסיתני בו לבלעו חנם

⁴ד ויען השטן את יהוה ויאמר עור בעד עור וכל אשר לאיש--יתן בעד נפשו

⁵ה אולם שלח נא ידך וגע אל עצמו ואל בשרו--אם לא אל פניך יברכך

⁶ו ויאמר יהוה אל השטן הנו בידך אך את נפשו שמר

⁷ז ויצא השטן מאת פני יהוה ויך את איוב בשחין רע מכף רגלו עד (ועד) קדקדו

⁸ח ויקח לו חרש להתגרד בו והוא ישב בתוך האפר

⁹ט ותאמר לו אשתו עדך מחזיק בתמתך ברך אלהים ומת

¹⁰י ויאמר אליה כדבר אחת הנבלות תדברי--גם את הטוב נקבל מאת האלהים ואת הרע לא נקבל בכל זאת לא חטא איוב בשפתיו {פ}

¹¹יא וישמעו שלשת רעי איוב את כל הרעה הזאת הבאה עליו ויבאו איש ממקמו אליפז התימני ובלדד השוחי וצופר הנעמתי ויועדו יחדו לבוא לנוד לו ולנחמו

¹²יב וישאו את עיניהם מרחוק ולא הכירהו וישאו קולם ויבכו ויקרעו איש מעלו ויזרקו עפר על ראשיהם השמימה

¹³יג וישבו אתו לארץ שבעת ימים ושבעת לילות ואין דבר אליו דבר--כי ראו כי גדל הכאב מאד