Read כֶּתֶר אֲרָם צוֹבָא - Tanah Aleppo Codex איוב 20 Bible Online

איוב 20 - כֶּתֶר אֲרָם צוֹבָא - Tanah Aleppo Codex bible

איוב 20

¹א ויען צפר הנעמתי ויאמר

²ב לכן שעפי ישיבוני ובעבור חושי בי

³ג מוסר כלמתי אשמע ורוח מבינתי יענני

⁴ד הזאת ידעת מני-עד מני שים אדם עלי-ארץ

⁵ה כי רננת רשעים מקרוב ושמחת חנף עדי-רגע

⁶ו אם-יעלה לשמים שיאו וראשו לעב יגיע

⁷ז כגללו לנצח יאבד ראיו יאמרו איו

⁸ח כחלום יעוף ולא ימצאהו וידד כחזיון לילה

⁹ט עין שזפתו ולא תוסיף ולא-עוד תשורנו מקומו

¹⁰י בניו ירצו דלים וידיו תשבנה אונו

¹¹יא עצמותיו מלאו עלומו ועמו על-עפר תשכב

¹²יב אם-תמתיק בפיו רעה-- יכחידנה תחת לשנו

¹³יג יחמל עליה ולא יעזבנה וימנענה בתוך חכו

¹⁴יד לחמו במעיו נהפך מרורת פתנים בקרבו

¹⁵טו חיל בלע ויקאנו מבטנו ירשנו אל

¹⁶טז ראש-פתנים יינק תהרגהו לשון אפעה

¹⁷יז אל-ירא בפלגות-- נהרי נחלי דבש וחמאה

¹⁸יח משיב יגע ולא יבלע כחיל תמורתו ולא יעלס

¹⁹יט כי-רצץ עזב דלים בית גזל ולא יבנהו

²⁰כ כי לא-ידע שלו בבטנו בחמודו לא ימלט

²¹כא אין-שריד לאכלו על-כן לא-יחיל טובו

²²כב במלאות שפקו יצר לו כל-יד עמל תבאנו

²³כג יהי למלא בטנו--ישלח-בו חרון אפו וימטר עלימו בלחומו

²⁴כד יברח מנשק ברזל תחלפהו קשת נחושה

²⁵כה שלף ויצא מגוה וברק ממררתו יהלך עליו אמים

²⁶כו כל-חשך טמון לצפוניו תאכלהו אש לא-נפח ירע שריד באהלו

²⁷כז יגלו שמים עונו וארץ מתקוממה לו

²⁸כח יגל יבול ביתו נגרות ביום אפו

²⁹כט זה חלק-אדם רשע--מאלהים ונחלת אמרו מאל