Read כֶּתֶר אֲרָם צוֹבָא - Tanah Aleppo Codex איוב 21 Bible Online

איוב 21 - כֶּתֶר אֲרָם צוֹבָא - Tanah Aleppo Codex bible

איוב 21

¹א ויען איוב ויאמר

²ב שמעו שמוע מלתי ותהי-זאת תנחומתיכם

³ג שאוני ואנכי אדבר ואחר דברי תלעיג

⁴ד האנכי לאדם שיחי ואם-מדוע לא-תקצר רוחי

⁵ה פנו-אלי והשמו ושימו יד על-פה

⁶ו ואם-זכרתי ונבהלתי ואחז בשרי פלצות

⁷ז מדוע רשעים יחיו עתקו גם-גברו חיל

⁸ח זרעם נכון לפניהם עמם וצאצאיהם לעיניהם

⁹ט בתיהם שלום מפחד ולא שבט אלוה עליהם

¹⁰י שורו עבר ולא יגעל תפלט פרתו ולא תשכל

¹¹יא ישלחו כצאן עויליהם וילדיהם ירקדון

¹²יב ישאו כתף וכנור וישמחו לקול עוגב

¹³יג יבלו (יכלו) בטוב ימיהם וברגע שאול יחתו

¹⁴יד ויאמרו לאל סור ממנו ודעת דרכיך לא חפצנו

¹⁵טו מה-שדי כי-נעבדנו ומה-נועיל כי נפגע-בו

¹⁶טז הן לא בידם טובם עצת רשעים רחקה מני

¹⁷יז כמה נר-רשעים ידעך-- ויבא עלימו אידם חבלים יחלק באפו

¹⁸יח יהיו כתבן לפני-רוח וכמץ גנבתו סופה

¹⁹יט אלוה יצפן-לבניו אונו ישלם אליו וידע

²⁰כ יראו עינו כידו ומחמת שדי ישתה

²¹כא כי מה-חפצו בביתו אחריו ומספר חדשיו חצצו

²²כב הלאל ילמד-דעת והוא רמים ישפוט

²³כג זה--ימות בעצם תמו כלו שלאנן ושליו

²⁴כד עטיניו מלאו חלב ומח עצמותיו ישקה

²⁵כה וזה--ימות בנפש מרה ולא-אכל בטובה

²⁶כו יחד על-עפר ישכבו ורמה תכסה עליהם

²⁷כז הן ידעתי מחשבותיכם ומזמות עלי תחמסו

²⁸כח כי תאמרו איה בית-נדיב ואיה אהל משכנות רשעים

²⁹כט הלא שאלתם עוברי דרך ואתתם לא תנכרו

³⁰ל כי ליום איד יחשך רע ליום עברות יובלו

³¹לא מי-יגיד על-פניו דרכו והוא-עשה מי ישלם-לו

³²לב והוא לקברות יובל ועל-גדיש ישקוד

³³לג מתקו-לו רגבי-נחל ואחריו כל-אדם ימשוך ולפניו אין מספר

³⁴לד ואיך תנחמוני הבל ותשובתיכם נשאר-מעל