Read כֶּתֶר אֲרָם צוֹבָא - Tanah Aleppo Codex איוב 27 Bible Online

איוב 27 - כֶּתֶר אֲרָם צוֹבָא - Tanah Aleppo Codex bible

איוב 27

¹א ויסף איוב שאת משלו ויאמר

²ב חי-אל הסיר משפטי ושדי המר נפשי

³ג כי-כל-עוד נשמתי בי ורוח אלוה באפי

⁴ד אם-תדברנה שפתי עולה ולשוני אם-יהגה רמיה

⁵ה חלילה לי אם-אצדיק אתכם עד-אגוע-- לא-אסיר תמתי ממני

⁶ו בצדקתי החזקתי ולא ארפה לא-יחרף לבבי מימי

⁷ז יהי כרשע איבי ומתקוממי כעול

⁸ח כי מה-תקות חנף כי יבצע כי ישל אלוה נפשו

⁹ט הצעקתו ישמע אל-- כי-תבוא עליו צרה

¹⁰י אם-על-שדי יתענג יקרא אלוה בכל-עת

¹¹יא אורה אתכם ביד-אל אשר עם-שדי לא אכחד

¹²יב הן-אתם כלכם חזיתם ולמה-זה הבל תהבלו

¹³יג זה חלק-אדם רשע עם-אל ונחלת עריצים משדי יקחו

¹⁴יד אם-ירבו בניו למו-חרב וצאצאיו לא ישבעו-לחם

¹⁵טו שרידיו במות יקברו ואלמנתיו לא תבכינה

¹⁶טז אם-יצבר כעפר כסף וכחמר יכין מלבוש

¹⁷יז יכין וצדיק ילבש וכסף נקי יחלק

¹⁸יח בנה כעש ביתו וכסכה עשה נצר

¹⁹יט עשיר ישכב ולא יאסף עיניו פקח ואיננו

²⁰כ תשיגהו כמים בלהות לילה גנבתו סופה

²¹כא ישאהו קדים וילך וישערהו ממקמו

²²כב וישלך עליו ולא יחמל מידו ברוח יברח

²³כג ישפק עלימו כפימו וישרק עליו ממקמו