Read כֶּתֶר אֲרָם צוֹבָא - Tanah Aleppo Codex איוב 28 Bible Online

איוב 28 - כֶּתֶר אֲרָם צוֹבָא - Tanah Aleppo Codex bible

איוב 28

¹א כי יש לכסף מוצא ומקום לזהב יזקו

²ב ברזל מעפר יקח ואבן יצוק נחושה

³ג קץ שם לחשך ולכל-תכלית הוא חוקר אבן אפל וצלמות

⁴ד פרץ נחל מעם-גר--הנשכחים מני-רגל דלו מאנוש נעו

⁵ה ארץ--ממנה יצא-לחם ותחתיה נהפך כמו-אש

⁶ו מקום-ספיר אבניה ועפרת זהב לו

⁷ז נתיב לא-ידעו עיט ולא שזפתו עין איה

⁸ח לא-הדריכוהו בני-שחץ לא-עדה עליו שחל

⁹ט בחלמיש שלח ידו הפך משרש הרים

¹⁰י בצורות יארים בקע וכל-יקר ראתה עינו

¹¹יא מבכי נהרות חבש ותעלמה יצא אור

¹²יב והחכמה מאין תמצא ואי זה מקום בינה

¹³יג לא-ידע אנוש ערכה ולא תמצא בארץ החיים

¹⁴יד תהום אמר לא בי-היא וים אמר אין עמדי

¹⁵טו לא-יתן סגור תחתיה ולא ישקל כסף מחירה

¹⁶טז לא-תסלה בכתם אופיר בשהם יקר וספיר

¹⁷יז לא-יערכנה זהב וזכוכית ותמורתה כלי-פז

¹⁸יח ראמות וגביש לא יזכר ומשך חכמה מפנינים

¹⁹יט לא-יערכנה פטדת-כוש בכתם טהור לא תסלה

²⁰כ והחכמה מאין תבוא ואי זה מקום בינה

²¹כא ונעלמה מעיני כל-חי ומעוף השמים נסתרה

²²כב אבדון ומות אמרו באזנינו שמענו שמעה

²³כג אלהים הבין דרכה והוא ידע את-מקומה

²⁴כד כי-הוא לקצות-הארץ יביט תחת כל-השמים יראה

²⁵כה לעשות לרוח משקל ומים תכן במדה

²⁶כו בעשתו למטר חק ודרך לחזיז קלות

²⁷כז אז ראה ויספרה הכינה וגם-חקרה

²⁸כח ויאמר לאדם--הן יראת אדני היא חכמה וסור מרע בינה