Read כֶּתֶר אֲרָם צוֹבָא - Tanah Aleppo Codex איוב 29 Bible Online

איוב 29 - כֶּתֶר אֲרָם צוֹבָא - Tanah Aleppo Codex bible

איוב 29

¹א ויסף איוב שאת משלו ויאמר

²ב מי-יתנני כירחי-קדם כימי אלוה ישמרני

³ג בהלו נרו עלי ראשי לאורו אלך חשך

⁴ד כאשר הייתי בימי חרפי בסוד אלוה עלי אהלי

⁵ה בעוד שדי עמדי סביבותי נערי

⁶ו ברחץ הליכי בחמה וצור יצוק עמדי פלגי-שמן

⁷ז בצאתי שער עלי-קרת ברחוב אכין מושבי

⁸ח ראוני נערים ונחבאו וישישים קמו עמדו

⁹ט שרים עצרו במלים וכף ישימו לפיהם

¹⁰י קול-נגידים נחבאו ולשונם לחכם דבקה

¹¹יא כי אזן שמעה ותאשרני ועין ראתה ותעידני

¹²יב כי-אמלט עני משוע ויתום ולא-עזר לו

¹³יג ברכת אבד עלי תבא ולב אלמנה ארנן

¹⁴יד צדק לבשתי וילבשני כמעיל וצניף משפטי

¹⁵טו עינים הייתי לעור ורגלים לפסח אני

¹⁶טז אב אנכי לאביונים ורב לא-ידעתי אחקרהו

¹⁷יז ואשברה מתלעות עול ומשניו אשליך טרף

¹⁸יח ואמר עם-קני אגוע וכחול ארבה ימים

¹⁹יט שרשי פתוח אלי-מים וטל ילין בקצירי

²⁰כ כבודי חדש עמדי וקשתי בידי תחליף

²¹כא לי-שמעו ויחלו וידמו למו עצתי

²²כב אחרי דברי לא ישנו ועלימו תטף מלתי

²³כג ויחלו כמטר לי ופיהם פערו למלקוש

²⁴כד אשחק אלהם לא יאמינו ואור פני לא יפילון

²⁵כה אבחר דרכם ואשב ראש ואשכון כמלך בגדוד כאשר אבלים ינחם