Read כֶּתֶר אֲרָם צוֹבָא - Tanah Aleppo Codex איוב 33 Bible Online

איוב 33 - כֶּתֶר אֲרָם צוֹבָא - Tanah Aleppo Codex bible

איוב 33

¹א ואולם--שמע-נא איוב מלי וכל-דברי האזינה

²ב הנה-נא פתחתי פי דברה לשוני בחכי

³ג ישר-לבי אמרי ודעת שפתי ברור מללו

⁴ד רוח-אל עשתני ונשמת שדי תחיני

⁵ה אם-תוכל השיבני ערכה לפני התיצבה

⁶ו הן-אני כפיך לאל מחמר קרצתי גם-אני

⁷ז הנה אמתי לא תבעתך ואכפי עליך לא-יכבד

⁸ח אך אמרת באזני וקול מלין אשמע

⁹ט זך אני בלי-פשע חף אנכי ולא עון לי

¹⁰י הן תנואות עלי ימצא יחשבני לאויב לו

¹¹יא ישם בסד רגלי ישמר כל-ארחתי

¹²יב הן-זאת לא-צדקת אענך כי-ירבה אלוה מאנוש

¹³יג מדוע אליו ריבות כי כל-דבריו לא יענה

¹⁴יד כי-באחת ידבר-אל ובשתים לא ישורנה

¹⁵טו בחלום חזיון לילה--בנפל תרדמה על-אנשים בתנומות עלי משכב

¹⁶טז אז יגלה אזן אנשים ובמסרם יחתם

¹⁷יז להסיר אדם מעשה וגוה מגבר יכסה

¹⁸יח יחשך נפשו מני-שחת וחיתו מעבר בשלח

¹⁹יט והוכח במכאוב על-משכבו וריב (ורוב) עצמיו אתן

²⁰כ וזהמתו חיתו לחם ונפשו מאכל תאוה

²¹כא יכל בשרו מראי ושפי (ושפו) עצמתיו לא ראו

²²כב ותקרב לשחת נפשו וחיתו לממתים

²³כג אם-יש עליו מלאך--מליץ אחד מני-אלף להגיד לאדם ישרו

²⁴כד ויחננו--ויאמר פדעהו מרדת שחת מצאתי כפר

²⁵כה רטפש בשרו מנער ישוב לימי עלומיו

²⁶כו יעתר אל-אלוה וירצהו וירא פניו בתרועה וישב לאנוש צדקתו

²⁷כז ישר על-אנשים ויאמר חטאתי וישר העויתי ולא-שוה לי

²⁸כח פדה נפשי (נפשו) מעבר בשחת וחיתי (וחיתו) באור תראה

²⁹כט הן-כל-אלה יפעל-אל-- פעמים שלוש עם-גבר

³⁰ל להשיב נפשו מני-שחת-- לאור באור החיים

³¹לא הקשב איוב שמע-לי החרש ואנכי אדבר

³²לב אם-יש-מלין השיבני דבר כי-חפצתי צדקך

³³לג אם-אין אתה שמע-לי החרש ואאלפך חכמה