Read כֶּתֶר אֲרָם צוֹבָא - Tanah Aleppo Codex איוב 37 Bible Online

איוב 37 - כֶּתֶר אֲרָם צוֹבָא - Tanah Aleppo Codex bible

איוב 37

¹א אף-לזאת יחרד לבי ויתר ממקומו

²ב שמעו שמוע ברגז קלו והגה מפיו יצא

³ג תחת-כל-השמים ישרהו ואורו על-כנפות הארץ

⁴ד אחריו ישאג-קול-- ירעם בקול גאונו ולא יעקבם כי-ישמע קולו

⁵ה ירעם אל בקולו נפלאות עשה גדלות ולא נדע

⁶ו כי לשלג יאמר-- הוא-ארץ וגשם מטר וגשם מטרות עזו

⁷ז ביד-כל-אדם יחתום-- לדעת כל-אנשי מעשהו

⁸ח ותבוא חיה במו-ארב ובמעונתיה תשכן

⁹ט מן-החדר תבוא סופה וממזרים קרה

¹⁰י מנשמת-אל יתן-קרח ורחב מים במוצק

¹¹יא אף-ברי יטריח עב יפיץ ענן אורו

¹²יב והוא מסבות מתהפך בתחבולתו לפעלם כל אשר יצום על-פני תבל ארצה

¹³יג אם-לשבט אם-לארצו-- אם-לחסד ימצאהו

¹⁴יד האזינה זאת איוב עמד והתבונן נפלאות אל

¹⁵טו התדע בשום-אלוה עליהם והפיע אור עננו

¹⁶טז התדע על-מפלשי-עב מפלאות תמים דעים

¹⁷יז אשר-בגדיך חמים-- בהשקט ארץ מדרום

¹⁸יח תרקיע עמו לשחקים חזקים כראי מוצק

¹⁹יט הודיענו מה-נאמר לו לא-נערך מפני-חשך

²⁰כ היספר-לו כי אדבר אם-אמר איש כי יבלע

²¹כא ועתה לא ראו אור-- בהיר הוא בשחקים ורוח עברה ותטהרם

²²כב מצפון זהב יאתה על-אלוה נורא הוד

²³כג שדי לא-מצאנהו שגיא-כח ומשפט ורב-צדקה לא יענה

²⁴כד לכן יראוהו אנשים לא-יראה כל-חכמי-לב