Read כֶּתֶר אֲרָם צוֹבָא - Tanah Aleppo Codex איוב 38 Bible Online

איוב 38 - כֶּתֶר אֲרָם צוֹבָא - Tanah Aleppo Codex bible

איוב 38

¹א ויען-יהוה את-איוב מנהסערה (מן הסערה) ויאמר

²ב מי זה מחשיך עצה במלין-- בלי-דעת

³ג אזר-נא כגבר חלציך ואשאלך והודיעני

⁴ד איפה היית ביסדי-ארץ הגד אם-ידעת בינה

⁵ה מי-שם ממדיה כי תדע או מי-נטה עליה קו

⁶ו על-מה אדניה הטבעו או מי-ירה אבן פנתה

⁷ז ברן-יחד כוכבי בקר ויריעו כל-בני אלהים

⁸ח ויסך בדלתים ים בגיחו מרחם יצא

⁹ט בשומי ענן לבשו וערפל חתלתו

¹⁰י ואשבר עליו חקי ואשים בריח ודלתים

¹¹יא ואמר--עד-פה תבוא ולא תסיף ופא-ישית בגאון גליך

¹²יב המימיך צוית בקר ידעתה שחר (ידעת השחר) מקמו

¹³יג לאחז בכנפות הארץ וינערו רשעים ממנה

¹⁴יד תתהפך כחמר חותם ויתיצבו כמו לבוש

¹⁵טו וימנע מרשעים אורם וזרוע רמה תשבר

¹⁶טז הבאת עד-נבכי-ים ובחקר תהום התהלכת

¹⁷יז הנגלו לך שערי-מות ושערי צלמות תראה

¹⁸יח התבננת עד-רחבי-ארץ הגד אם-ידעת כלה

¹⁹יט אי-זה הדרך ישכן-אור וחשך אי-זה מקמו

²⁰כ כי תקחנו אל-גבולו וכי-תבין נתיבות ביתו

²¹כא ידעת כי-אז תולד ומספר ימיך רבים

²²כב הבאת אל-אצרות שלג ואוצרות ברד תראה

²³כג אשר-חשכתי לעת-צר ליום קרב ומלחמה

²⁴כד אי-זה הדרך יחלק אור יפץ קדים עלי-ארץ

²⁵כה מי-פלג לשטף תעלה ודרך לחזיז קלות

²⁶כו להמטיר על-ארץ לא-איש-- מדבר לא-אדם בו

²⁷כז להשביע שאה ומשאה ולהצמיח מצא דשא

²⁸כח היש-למטר אב או מי-הוליד אגלי-טל

²⁹כט מבטן מי יצא הקרח וכפר שמים מי ילדו

³⁰ל כאבן מים יתחבאו ופני תהום יתלכדו

³¹לא התקשר מעדנות כימה או-משכות כסיל תפתח

³²לב התציא מזרות בעתו ועיש על-בניה תנחם

³³לג הידעת חקות שמים אם-תשים משטרו בארץ

³⁴לד התרים לעב קולך ושפעת-מים תכסך

³⁵לה התשלח ברקים וילכו ויאמרו לך הננו

³⁶לו מי-שת בטחות חכמה או מי-נתן לשכוי בינה

³⁷לז מי-יספר שחקים בחכמה ונבלי שמים מי ישכיב

³⁸לח בצקת עפר למוצק ורגבים ידבקו

³⁹לט התצוד ללביא טרף וחית כפירים תמלא

⁴⁰מ כי-ישחו במעונות ישבו בסכה למו-ארב

⁴¹מא מי יכין לערב צידו כי-ילדו אל-אל ישועו יתעו לבלי-אכל