Read כֶּתֶר אֲרָם צוֹבָא - Tanah Aleppo Codex איוב 39 Bible Online

איוב 39 - כֶּתֶר אֲרָם צוֹבָא - Tanah Aleppo Codex bible

איוב 39

¹א הידעת--עת לדת יעלי-סלע חלל אילות תשמר

²ב תספר ירחים תמלאנה וידעת עת לדתנה

³ג תכרענה ילדיהן תפלחנה חבליהם תשלחנה

⁴ד יחלמו בניהם ירבו בבר יצאו ולא-שבו למו

⁵ה מי-שלח פרא חפשי ומסרות ערוד מי פתח

⁶ו אשר-שמתי ערבה ביתו ומשכנותיו מלחה

⁷ז ישחק להמון קריה תשאות נגש לא ישמע

⁸ח יתור הרים מרעהו ואחר כל-ירוק ידרוש

⁹ט היאבה רים עבדך אם-ילין על-אבוסך

¹⁰י התקשר-רים בתלם עבתו אם-ישדד עמקים אחריך

¹¹יא התבטח-בו כי-רב כחו ותעזב אליו יגיעך

¹²יב התאמין בו כי-ישוב (ישיב) זרעך וגרנך יאסף

¹³יג כנף-רננים נעלסה אם-אברה חסידה ונצה

¹⁴יד כי-תעזב לארץ בציה ועל-עפר תחמם

¹⁵טו ותשכח כי-רגל תזורה וחית השדה תדושה

¹⁶טז הקשיח בניה ללא-לה לריק יגיעה בלי-פחד

¹⁷יז כי-השה אלוה חכמה ולא-חלק לה בבינה

¹⁸יח כעת במרום תמריא תשחק לסוס ולרכבו

¹⁹יט התתן לסוס גבורה התלביש צוארו רעמה

²⁰כ התרעישנו כארבה הוד נחרו אימה

²¹כא יחפרו בעמק וישיש בכח יצא לקראת-נשק

²²כב ישחק לפחד ולא יחת ולא-ישוב מפני-חרב

²³כג עליו תרנה אשפה להב חנית וכידון

²⁴כד ברעש ורגז יגמא-ארץ ולא-יאמין כי-קול שופר

²⁵כה בדי שפר יאמר האח-- ומרחוק יריח מלחמה רעם שרים ותרועה

²⁶כו המבינתך יאבר-נץ יפרש כנפו לתימן

²⁷כז אם-על-פיך יגביה נשר וכי ירים קנו

²⁸כח סלע ישכן ויתלנן-- על שן-סלע ומצודה

²⁹כט משם חפר-אכל למרחוק עיניו יביטו

³⁰ל ואפרחו יעלעו-דם ובאשר חללים שם הוא