Read כֶּתֶר אֲרָם צוֹבָא - Tanah Aleppo Codex איוב 4 Bible Online

איוב 4 - כֶּתֶר אֲרָם צוֹבָא - Tanah Aleppo Codex bible

איוב 4

¹א ויען אליפז התימני ויאמר

²ב הנסה דבר אליך תלאה ועצר במלין מי יוכל

³ג הנה יסרת רבים וידים רפות תחזק

⁴ד כושל יקימון מליך וברכים כרעות תאמץ

⁵ה כי עתה תבוא אליך ותלא תגע עדיך ותבהל

⁶ו הלא יראתך כסלתך תקותך ותם דרכיך

⁷ז זכר-נא--מי הוא נקי אבד ואיפה ישרים נכחדו

⁸ח כאשר ראיתי חרשי און וזרעי עמל יקצרהו

⁹ט מנשמת אלוה יאבדו ומרוח אפו יכלו

¹⁰י שאגת אריה וקול שחל ושני כפירים נתעו

¹¹יא ליש אבד מבלי-טרף ובני לביא יתפרדו

¹²יב ואלי דבר יגנב ותקח אזני שמץ מנהו

¹³יג בשעפים מחזינות לילה בנפל תרדמה על-אנשים

¹⁴יד פחד קראני ורעדה ורב עצמותי הפחיד

¹⁵טו ורוח על-פני יחלף תסמר שערת בשרי

¹⁶טז יעמד ולא אכיר מראהו-- תמונה לנגד עיני דממה וקול אשמע

¹⁷יז האנוש מאלוה יצדק אם מעשהו יטהר-גבר

¹⁸יח הן בעבדיו לא יאמין ובמלאכיו ישים תהלה

¹⁹יט אף שכני בתי-חמר--אשר-בעפר יסודם ידכאום לפני-עש

²⁰כ מבקר לערב יכתו מבלי משים לנצח יאבדו

²¹כא הלא-נסע יתרם בם ימותו ולא בחכמה