Read כֶּתֶר אֲרָם צוֹבָא - Tanah Aleppo Codex איוב 40 Bible Online

איוב 40 - כֶּתֶר אֲרָם צוֹבָא - Tanah Aleppo Codex bible

איוב 40

¹א ויען יהוה את-איוב ויאמר

²ב הרב עם-שדי יסור מוכיח אלוה יעננה

³ג ויען איוב את-יהוה ויאמר

⁴ד הן קלתי מה אשיבך ידי שמתי למו-פי

⁵ה אחת דברתי ולא אענה ושתים ולא אוסיף

⁶ו ויען-יהוה את-איוב מנסערה (מן סערה) ויאמר

⁷ז אזר-נא כגבר חלציך אשאלך והודיעני

⁸ח האף תפר משפטי תרשיעני למען תצדק

⁹ט ואם-זרוע כאל לך ובקול כמהו תרעם

¹⁰י עדה נא גאון וגבה והוד והדר תלבש

¹¹יא הפץ עברות אפך וראה כל-גאה והשפילהו

¹²יב ראה כל-גאה הכניעהו והדך רשעים תחתם

¹³יג טמנם בעפר יחד פניהם חבש בטמון

¹⁴יד וגם-אני אודך כי-תושע לך ימינך

¹⁵טו הנה-נא בהמות אשר-עשיתי עמך חציר כבקר יאכל

¹⁶טז הנה-נא כחו במתניו ואונו בשרירי בטנו

¹⁷יז יחפץ זנבו כמו-ארז גידי פחדו ישרגו

¹⁸יח עצמיו אפיקי נחשה גרמיו כמטיל ברזל

¹⁹יט הוא ראשית דרכי-אל העשו יגש חרבו

²⁰כ כי-בול הרים ישאו-לו וכל-חית השדה ישחקו-שם

²¹כא תחת-צאלים ישכב-- בסתר קנה ובצה

²²כב יסכהו צאלים צללו יסבוהו ערבי-נחל

²³כג הן יעשק נהר לא יחפוז יבטח כי-יגיח ירדן אל-פיהו

²⁴כד בעיניו יקחנו במוקשים ינקב-אף [ (Job 40:25) כה תמשך לויתן בחכה ובחבל תשקיע לשנו ] [ (Job 40:26) כו התשים אגמן באפו ובחוח תקב לחיו ] [ (Job 40:27) כז הירבה אליך תחנונים אם-ידבר אליך רכות ] [ (Job 40:28) כח היכרת ברית עמך תקחנו לעבד עולם ] [ (Job 40:29) כט התשחק-בו כצפור ותקשרנו לנערותיך ] [ (Job 40:30) ל יכרו עליו חברים יחצוהו בין כנענים ] [ (Job 40:31) לא התמלא בשכות עורו ובצלצל דגים ראשו ] [ (Job 40:32) לב שים-עליו כפך זכר מלחמה אל-תוסף ]