Read כֶּתֶר אֲרָם צוֹבָא - Tanah Aleppo Codex איוב 7 Bible Online

איוב 7 - כֶּתֶר אֲרָם צוֹבָא - Tanah Aleppo Codex bible

איוב 7

¹א הלא-צבא לאנוש על- (עלי-) ארץ וכימי שכיר ימיו

²ב כעבד ישאף-צל וכשכיר יקוה פעלו

³ג כן הנחלתי לי ירחי-שוא ולילות עמל מנו-לי

⁴ד אם-שכבתי-- ואמרתי מתי אקום ומדד-ערב ושבעתי נדדים עדי-נשף

⁵ה לבש בשרי רמה וגיש (וגוש) עפר עורי רגע וימאס

⁶ו ימי קלו מני-ארג ויכלו באפס תקוה

⁷ז זכר כי-רוח חיי לא-תשוב עיני לראות טוב

⁸ח לא-תשורני עין ראי עיניך בי ואינני

⁹ט כלה ענן וילך כן יורד שאול לא יעלה

¹⁰י לא-ישוב עוד לביתו ולא-יכירנו עוד מקמו

¹¹יא גם-אני לא אחשך-פי אדברה בצר רוחי אשיחה במר נפשי

¹²יב הים-אני אם-תנין כי-תשים עלי משמר

¹³יג כי-אמרתי תנחמני ערשי ישא בשיחי משכבי

¹⁴יד וחתתני בחלמות ומחזינות תבעתני

¹⁵טו ותבחר מחנק נפשי מות מעצמותי

¹⁶טז מאסתי לא-לעלם אחיה חדל ממני כי-הבל ימי

¹⁷יז מה-אנוש כי תגדלנו וכי-תשית אליו לבך

¹⁸יח ותפקדנו לבקרים לרגעים תבחננו

¹⁹יט כמה לא-תשעה ממני לא-תרפני עד-בלעי רקי

²⁰כ חטאתי מה אפעל לך-- נצר האדם למה שמתני למפגע לך ואהיה עלי למשא

²¹כא ומה לא-תשא פשעי-- ותעביר את-עוני כי-עתה לעפר אשכב ושחרתני ואינני