Read כֶּתֶר אֲרָם צוֹבָא - Tanah Aleppo Codex איוב 8 Bible Online

איוב 8 - כֶּתֶר אֲרָם צוֹבָא - Tanah Aleppo Codex bible

איוב 8

¹א ויען בלדד השוחי ויאמר

²ב עד-אן תמלל-אלה ורוח כביר אמרי-פיך

³ג האל יעות משפט ואם-שדי יעות-צדק

⁴ד אם-בניך חטאו-לו וישלחם ביד-פשעם

⁵ה אם-אתה תשחר אל-אל ואל-שדי תתחנן

⁶ו אם-זך וישר אתה כי-עתה יעיר עליך ושלם נות צדקך

⁷ז והיה ראשיתך מצער ואחריתך ישגה מאד

⁸ח כי-שאל-נא לדר רישון וכונן לחקר אבותם

⁹ט כי-תמול אנחנו ולא נדע כי צל ימינו עלי-ארץ

¹⁰י הלא-הם יורוך יאמרו לך ומלבם יוצאו מלים

¹¹יא היגאה-גמא בלא בצה ישגה-אחו בלי-מים

¹²יב עדנו באבו לא יקטף ולפני כל-חציר ייבש

¹³יג כן--ארחות כל-שכחי אל ותקות חנף תאבד

¹⁴יד אשר-יקוט כסלו ובית עכביש מבטחו

¹⁵טו ישען על-ביתו ולא יעמד יחזיק בו ולא יקום

¹⁶טז רטב הוא לפני-שמש ועל גנתו ינקתו תצא

¹⁷יז על-גל שרשיו יסבכו בית אבנים יחזה

¹⁸יח אם-יבלענו ממקמו וכחש בו לא ראיתיך

¹⁹יט הן-הוא משוש דרכו ומעפר אחר יצמחו

²⁰כ הן-אל לא ימאס-תם ולא-יחזיק ביד-מרעים

²¹כא עד-ימלה שחוק פיך ושפתיך תרועה

²²כב שנאיך ילבשו-בשת ואהל רשעים איננו