Read כֶּתֶר אֲרָם צוֹבָא - Tanah Aleppo Codex איוב 9 Bible Online

איוב 9 - כֶּתֶר אֲרָם צוֹבָא - Tanah Aleppo Codex bible

איוב 9

¹א ויען איוב ויאמר

²ב אמנם ידעתי כי-כן ומה-יצדק אנוש עם-אל

³ג אם-יחפץ לריב עמו-- לא-יעננו אחת מני-אלף

⁴ד חכם לבב ואמיץ כח-- מי-הקשה אליו וישלם

⁵ה המעתיק הרים ולא ידעו-- אשר הפכם באפו

⁶ו המרגיז ארץ ממקומה ועמודיה יתפלצון

⁷ז האמר לחרס ולא יזרח ובעד כוכבים יחתם

⁸ח נטה שמים לבדו ודורך על-במתי ים

⁹ט עשה-עש כסיל וכימה וחדרי תמן

¹⁰י עשה גדלות עד-אין חקר ונפלאות עד-אין מספר

¹¹יא הן יעבר עלי ולא אראה ויחלף ולא-אבין לו

¹²יב הן יחתף מי ישיבנו מי-יאמר אליו מה-תעשה

¹³יג אלוה לא-ישיב אפו תחתו שחחו עזרי רהב

¹⁴יד אף כי-אנכי אעננו אבחרה דברי עמו

¹⁵טו אשר אם-צדקתי לא אענה למשפטי אתחנן

¹⁶טז אם-קראתי ויענני-- לא-אאמין כי-יאזין קולי

¹⁷יז אשר-בשערה ישופני והרבה פצעי חנם

¹⁸יח לא-יתנני השב רוחי כי ישבעני ממררים

¹⁹יט אם-לכח אמיץ הנה ואם-למשפט מי יועידני

²⁰כ אם-אצדק פי ירשיעני תם-אני ויעקשני

²¹כא תם-אני לא-אדע נפשי אמאס חיי

²²כב אחת היא על-כן אמרתי--תם ורשע הוא מכלה

²³כג אם-שוט ימית פתאם-- למסת נקים ילעג

²⁴כד ארץ נתנה ביד-רשע-- פני-שפטיה יכסה אם-לא אפוא מי-הוא

²⁵כה וימי קלו מני-רץ ברחו לא-ראו טובה

²⁶כו חלפו עם-אניות אבה כנשר יטוש עלי-אכל

²⁷כז אם-אמרי אשכחה שיחי אעזבה פני ואבליגה

²⁸כח יגרתי כל-עצבתי ידעתי כי-לא תנקני

²⁹כט אנכי ארשע למה-זה הבל איגע

³⁰ל אם-התרחצתי במו- (במי-) שלג והזכותי בבר כפי

³¹לא אז בשחת תטבלני ותעבוני שלמותי

³²לב כי-לא-איש כמוני אעננו נבוא יחדו במשפט

³³לג לא יש-בינינו מוכיח-- ישת ידו על-שנינו

³⁴לד יסר מעלי שבטו ואמתו אל-תבעתני

³⁵לה אדברה ולא איראנו כי לא-כן אנכי עמדי