Read כֶּתֶר אֲרָם צוֹבָא - Tanah Aleppo Codex תהלים 10 Bible Online

תהלים 10 - כֶּתֶר אֲרָם צוֹבָא - Tanah Aleppo Codex bible

תהלים 10

¹א למה יהוה תעמד ברחוק תעלים לעתות בצרה

²ב בגאות רשע ידלק עני יתפשו במזמות זו חשבו

³ג כי-הלל רשע על-תאות נפשו ובצע ברך נאץ יהוה

⁴ד רשע--כגבה אפו בל-ידרש אין אלהים כל-מזמותיו

⁵ה יחילו דרכו בכל-עת--מרום משפטיך מנגדו כל-צורריו יפיח בהם

⁶ו אמר בלבו בל-אמוט לדר ודר אשר לא-ברע

⁷ז אלה פיהו מלא--ומרמות ותך תחת לשונו עמל ואון

⁸ח ישב במארב חצרים--במסתרים יהרג נקי עיניו לחלכה יצפנו

⁹ט יארב במסתר כאריה בסכה-- יארב לחטוף עני יחטף עני במשכו ברשתו

¹⁰י ודכה (ידכה) ישח ונפל בעצומיו חלכאים (חל כאים)

¹¹יא אמר בלבו שכח אל הסתיר פניו בל-ראה לנצח

¹²יב קומה יהוה--אל נשא ידך אל-תשכח עניים (ענוים)

¹³יג על-מה נאץ רשע אלהים אמר בלבו לא תדרש

¹⁴יד ראתה כי-אתה עמל וכעס תביט-- לתת בידך עליך יעזב חלכה יתום אתה היית עוזר

¹⁵טו שבר זרוע רשע ורע תדרוש-רשעו בל-תמצא

¹⁶טז יהוה מלך עולם ועד אבדו גוים מארצו

¹⁷יז תאות ענוים שמעת יהוה תכין לבם תקשיב אזנך

¹⁸יח לשפט יתום ודך בל-יוסיף עוד--לערץ אנוש מן-הארץ