Read כֶּתֶר אֲרָם צוֹבָא - Tanah Aleppo Codex תהלים 103 Bible Online

תהלים 103 - כֶּתֶר אֲרָם צוֹבָא - Tanah Aleppo Codex bible

תהלים 103

¹א לדוד ברכי נפשי את-יהוה וכל-קרבי את-שם קדשו

²ב ברכי נפשי את-יהוה ואל-תשכחי כל-גמוליו

³ג הסלח לכל-עונכי הרפא לכל-תחלואיכי

⁴ד הגואל משחת חייכי המעטרכי חסד ורחמים

⁵ה המשביע בטוב עדיך תתחדש כנשר נעוריכי

⁶ו עשה צדקות יהוה ומשפטים לכל-עשוקים

⁷ז יודיע דרכיו למשה לבני ישראל עלילותיו

⁸ח רחום וחנון יהוה ארך אפים ורב-חסד

⁹ט לא-לנצח יריב ולא לעולם יטור

¹⁰י לא כחטאינו עשה לנו ולא כעונתינו גמל עלינו

¹¹יא כי כגבה שמים על-הארץ-- גבר חסדו על-יראיו

¹²יב כרחק מזרח ממערב-- הרחיק ממנו את-פשעינו

¹³יג כרחם אב על-בנים-- רחם יהוה על-יראיו

¹⁴יד כי-הוא ידע יצרנו זכור כי-עפר אנחנו

¹⁵טו אנוש כחציר ימיו כציץ השדה כן יציץ

¹⁶טז כי רוח עברה-בו ואיננו ולא-יכירנו עוד מקומו

¹⁷יז וחסד יהוה מעולם ועד-עולם-- על-יראיו וצדקתו לבני בנים

¹⁸יח לשמרי בריתו ולזכרי פקדיו לעשותם

¹⁹יט יהוה--בשמים הכין כסאו ומלכותו בכל משלה

²⁰כ ברכו יהוה מלאכיו גברי כח עשי דברו לשמע בקול דברו

²¹כא ברכו יהוה כל-צבאיו-- משרתיו עשי רצונו

²²כב ברכו יהוה כל-מעשיו-- בכל-מקמות ממשלתו ברכי נפשי את-יהוה