Read כֶּתֶר אֲרָם צוֹבָא - Tanah Aleppo Codex תהלים 104 Bible Online

תהלים 104 - כֶּתֶר אֲרָם צוֹבָא - Tanah Aleppo Codex bible

תהלים 104

¹א ברכי נפשי את-יהוה יהוה אלהי גדלת מאד הוד והדר לבשת

²ב עטה-אור כשלמה נוטה שמים כיריעה

³ג המקרה במים עליותיו השם-עבים רכובו המהלך על-כנפי-רוח

⁴ד עשה מלאכיו רוחות משרתיו אש להט

⁵ה יסד-ארץ על-מכוניה בל-תמוט עולם ועד

⁶ו תהום כלבוש כסיתו על-הרים יעמדו מים

⁷ז מן-גערתך ינוסון מן-קול רעמך יחפזון

⁸ח יעלו הרים ירדו בקעות-- אל-מקום זה יסדת להם

⁹ט גבול-שמת בל-יעברון בל-ישבון לכסות הארץ

¹⁰י המשלח מעינים בנחלים בין הרים יהלכון

¹¹יא ישקו כל-חיתו שדי ישברו פראים צמאם

¹²יב עליהם עוף-השמים ישכון מבין עפאים יתנו-קול

¹³יג משקה הרים מעליותיו מפרי מעשיך תשבע הארץ

¹⁴יד מצמיח חציר לבהמה ועשב לעבדת האדם להוציא לחם מן-הארץ

¹⁵טו ויין ישמח לבב-אנוש-- להצהיל פנים משמן ולחם לבב-אנוש יסעד

¹⁶טז ישבעו עצי יהוה-- ארזי לבנון אשר נטע

¹⁷יז אשר-שם צפרים יקננו חסידה ברושים ביתה

¹⁸יח הרים הגבהים ליעלים סלעים מחסה לשפנים

¹⁹יט עשה ירח למועדים שמש ידע מבואו

²⁰כ תשת-חשך ויהי לילה-- בו-תרמש כל-חיתו-יער

²¹כא הכפירים שאגים לטרף ולבקש מאל אכלם

²²כב תזרח השמש יאספון ואל-מעונתם ירבצון

²³כג יצא אדם לפעלו ולעבדתו עדי-ערב

²⁴כד מה-רבו מעשיך יהוה-- כלם בחכמה עשית מלאה הארץ קנינך

²⁵כה זה הים גדול-- ורחב ידים שם-רמש ואין מספר חיות קטנות עם-גדלות

²⁶כו שם אניות יהלכון לויתן זה-יצרת לשחק-בו

²⁷כז כלם אליך ישברון-- לתת אכלם בעתו

²⁸כח תתן להם ילקטון תפתח ידך ישבעון טוב

²⁹כט תסתיר פניך יבהלון תסף רוחם יגועון ואל-עפרם ישובון

³⁰ל תשלח רוחך יבראון ותחדש פני אדמה

³¹לא יהי כבוד יהוה לעולם ישמח יהוה במעשיו

³²לב המביט לארץ ותרעד יגע בהרים ויעשנו

³³לג אשירה ליהוה בחיי אזמרה לאלהי בעודי

³⁴לד יערב עליו שיחי אנכי אשמח ביהוה

³⁵לה יתמו חטאים מן-הארץ ורשעים עוד אינם-- ברכי נפשי את-יהוה הללו-יה