Read כֶּתֶר אֲרָם צוֹבָא - Tanah Aleppo Codex תהלים 105 Bible Online

תהלים 105 - כֶּתֶר אֲרָם צוֹבָא - Tanah Aleppo Codex bible

תהלים 105

¹א הודו ליהוה קראו בשמו הודיעו בעמים עלילותיו

²ב שירו-לו זמרו-לו שיחו בכל-נפלאותיו

³ג התהללו בשם קדשו ישמח לב מבקשי יהוה

⁴ד דרשו יהוה ועזו בקשו פניו תמיד

⁵ה זכרו--נפלאותיו אשר-עשה מפתיו ומשפטי-פיו

⁶ו זרע אברהם עבדו בני יעקב בחיריו

⁷ז הוא יהוה אלהינו בכל-הארץ משפטיו

⁸ח זכר לעולם בריתו דבר צוה לאלף דור

⁹ט אשר כרת את-אברהם ושבועתו לישחק

¹⁰י ויעמידה ליעקב לחק לישראל ברית עולם

¹¹יא לאמר--לך אתן את-ארץ-כנען חבל נחלתכם

¹²יב בהיותם מתי מספר כמעט וגרים בה

¹³יג ויתהלכו מגוי אל-גוי מממלכה אל-עם אחר

¹⁴יד לא-הניח אדם לעשקם ויוכח עליהם מלכים

¹⁵טו אל-תגעו במשיחי ולנביאי אל-תרעו

¹⁶טז ויקרא רעב על-הארץ כל-מטה-לחם שבר

¹⁷יז שלח לפניהם איש לעבד נמכר יוסף

¹⁸יח ענו בכבל רגליו (רגלו) ברזל באה נפשו

¹⁹יט עד-עת בא-דברו-- אמרת יהוה צרפתהו

²⁰כ שלח מלך ויתירהו משל עמים ויפתחהו

²¹כא שמו אדון לביתו ומשל בכל-קנינו

²²כב לאסר שריו בנפשו וזקניו יחכם

²³כג ויבא ישראל מצרים ויעקב גר בארץ-חם

²⁴כד ויפר את-עמו מאד ויעצמהו מצריו

²⁵כה הפך לבם לשנא עמו להתנכל בעבדיו

²⁶כו שלח משה עבדו אהרן אשר בחר-בו

²⁷כז שמו-בם דברי אתותיו ומפתים בארץ חם

²⁸כח שלח חשך ויחשך ולא-מרו את-דבריו (דברו)

²⁹כט הפך את-מימיהם לדם וימת את-דגתם

³⁰ל שרץ ארצם צפרדעים בחדרי מלכיהם

³¹לא אמר ויבא ערב כנים בכל-גבולם

³²לב נתן גשמיהם ברד אש להבות בארצם

³³לג ויך גפנם ותאנתם וישבר עץ גבולם

³⁴לד אמר ויבא ארבה וילק ואין מספר

³⁵לה ויאכל כל-עשב בארצם ויאכל פרי אדמתם

³⁶לו ויך כל-בכור בארצם ראשית לכל-אונם

³⁷לז ויוציאם בכסף וזהב ואין בשבטיו כושל

³⁸לח שמח מצרים בצאתם כי-נפל פחדם עליהם

³⁹לט פרש ענן למסך ואש להאיר לילה

⁴⁰מ שאל ויבא שלו ולחם שמים ישביעם

⁴¹מא פתח צור ויזובו מים הלכו בציות נהר

⁴²מב כי-זכר את-דבר קדשו את-אברהם עבדו

⁴³מג ויוצא עמו בששון ברנה את-בחיריו

⁴⁴מד ויתן להם ארצות גוים ועמל לאמים יירשו

⁴⁵מה בעבור ישמרו חקיו-- ותורתיו ינצרו הללו-יה