Read כֶּתֶר אֲרָם צוֹבָא - Tanah Aleppo Codex תהלים 106 Bible Online

תהלים 106 - כֶּתֶר אֲרָם צוֹבָא - Tanah Aleppo Codex bible

תהלים 106

¹א הללו-יה הודו ליהוה כי-טוב-- כי לעולם חסדו

²ב מי--ימלל גבורות יהוה ישמיע כל-תהלתו

³ג אשרי שמרי משפט עשה צדקה בכל-עת

⁴ד זכרני יהוה ברצון עמך פקדני בישועתך

⁵ה לראות בטובת בחיריך-- לשמח בשמחת גויך להתהלל עם-נחלתך

⁶ו חטאנו עם-אבותינו העוינו הרשענו

⁷ז אבותינו במצרים לא-השכילו נפלאותיך-- לא זכרו את-רב חסדיך וימרו על-ים בים-סוף

⁸ח ויושיעם למען שמו-- להודיע את-גבורתו

⁹ט ויגער בים-סוף ויחרב ויוליכם בתהמות כמדבר

¹⁰י ויושיעם מיד שונא ויגאלם מיד אויב

¹¹יא ויכסו-מים צריהם אחד מהם לא נותר

¹²יב ויאמינו בדבריו ישירו תהלתו

¹³יג מהרו שכחו מעשיו לא-חכו לעצתו

¹⁴יד ויתאוו תאוה במדבר וינסו-אל בישימון

¹⁵טו ויתן להם שאלתם וישלח רזון בנפשם

¹⁶טז ויקנאו למשה במחנה לאהרן קדוש יהוה

¹⁷יז תפתח-ארץ ותבלע דתן ותכס על-עדת אבירם

¹⁸יח ותבער-אש בעדתם להבה תלהט רשעים

¹⁹יט יעשו-עגל בחרב וישתחוו למסכה

²⁰כ וימירו את-כבודם בתבנית שור אכל עשב

²¹כא שכחו אל מושיעם-- עשה גדלות במצרים

²²כב נפלאות בארץ חם נוראות על-ים-סוף

²³כג ויאמר להשמידם לולי משה בחירו-- עמד בפרץ לפניו להשיב חמתו מהשחית

²⁴כד וימאסו בארץ חמדה לא-האמינו לדברו

²⁵כה וירגנו באהליהם לא שמעו בקול יהוה

²⁶כו וישא ידו להם-- להפיל אותם במדבר

²⁷כז ולהפיל זרעם בגוים ולזרותם בארצות

²⁸כח ויצמדו לבעל פעור ויאכלו זבחי מתים

²⁹כט ויכעיסו במעלליהם ותפרץ-בם מגפה

³⁰ל ויעמד פינחס ויפלל ותעצר המגפה

³¹לא ותחשב לו לצדקה לדר ודר עד-עולם

³²לב ויקציפו על-מי מריבה וירע למשה בעבורם

³³לג כי-המרו את-רוחו ויבטא בשפתיו

³⁴לד לא-השמידו את-העמים-- אשר אמר יהוה להם

³⁵לה ויתערבו בגוים וילמדו מעשיהם

³⁶לו ויעבדו את-עצביהם ויהיו להם למוקש

³⁷לז ויזבחו את-בניהם ואת-בנותיהם-- לשדים

³⁸לח וישפכו דם נקי דם-בניהם ובנותיהם-- אשר זבחו לעצבי כנען ותחנף הארץ בדמים

³⁹לט ויטמאו במעשיהם ויזנו במעלליהם

⁴⁰מ ויחר-אף יהוה בעמו ויתעב את-נחלתו

⁴¹מא ויתנם ביד-גוים וימשלו בהם שנאיהם

⁴²מב וילחצום אויביהם ויכנעו תחת ידם

⁴³מג פעמים רבות יצילם והמה ימרו בעצתם וימכו בעונם

⁴⁴מד וירא בצר להם-- בשמעו את-רנתם

⁴⁵מה ויזכר להם בריתו וינחם כרב חסדו

⁴⁶מו ויתן אותם לרחמים-- לפני כל-שוביהם

⁴⁷מז הושיענו יהוה אלהינו וקבצנו מן-הגוים להדות לשם קדשך להשתבח בתהלתך

⁴⁸מח ברוך יהוה אלהי ישראל מן-העולם ועד העולם-- ואמר כל-העם אמן הללו-יה