Read כֶּתֶר אֲרָם צוֹבָא - Tanah Aleppo Codex תהלים 107 Bible Online

תהלים 107 - כֶּתֶר אֲרָם צוֹבָא - Tanah Aleppo Codex bible

תהלים 107

¹א הדו ליהוה כי-טוב כי לעולם חסדו

²ב יאמרו גאולי יהוה-- אשר גאלם מיד-צר

³ג ומארצות קבצם ממזרח וממערב מצפון ומים

⁴ד תעו במדבר בישימון דרך עיר מושב לא מצאו

⁵ה רעבים גם-צמאים-- נפשם בהם תתעטף

⁶ו ויצעקו אל-יהוה בצר להם ממצוקותיהם יצילם

⁷ז וידריכם בדרך ישרה-- ללכת אל-עיר מושב

⁸ח יודו ליהוה חסדו ונפלאותיו לבני אדם

⁹ט כי-השביע נפש שקקה ונפש רעבה מלא-טוב

¹⁰י ישבי חשך וצלמות אסירי עני וברזל

¹¹יא כי-המרו אמרי-אל ועצת עליון נאצו

¹²יב ויכנע בעמל לבם כשלו ואין עזר

¹³יג ויזעקו אל-יהוה בצר להם ממצקותיהם יושיעם

¹⁴יד יוציאם מחשך וצלמות ומוסרותיהם ינתק

¹⁵טו יודו ליהוה חסדו ונפלאותיו לבני אדם

¹⁶טז כי-שבר דלתות נחשת ובריחי ברזל גדע

¹⁷יז אולים מדרך פשעם ומעונתיהם יתענו

¹⁸יח כל-אכל תתעב נפשם ויגיעו עד-שערי מות

¹⁹יט ויזעקו אל-יהוה בצר להם ממצקותיהם יושיעם

²⁰כ ישלח דברו וירפאם וימלט משחיתותם

²¹כא יודו ליהוה חסדו ונפלאותיו לבני אדם

²²כב ויזבחו זבחי תודה ויספרו מעשיו ברנה

²³כג ] יורדי הים באניות עשי מלאכה במים רבים

²⁴כד ] המה ראו מעשי יהוה ונפלאותיו במצולה

²⁵כה ] ויאמר--ויעמד רוח סערה ותרומם גליו

²⁶כו ] יעלו שמים ירדו תהומות נפשם ברעה תתמוגג

²⁷כז ] יחוגו וינועו כשכור וכל-חכמתם תתבלע

²⁸כח ] ויצעקו אל-יהוה בצר להם וממצוקתיהם יוציאם

²⁹כט יקם סערה לדממה ויחשו גליהם

³⁰ל וישמחו כי-ישתקו וינחם אל-מחוז חפצם

³¹לא יודו ליהוה חסדו ונפלאותיו לבני אדם

³²לב וירוממוהו בקהל-עם ובמושב זקנים יהללוהו

³³לג ישם נהרות למדבר ומצאי מים לצמאון

³⁴לד ארץ פרי למלחה מרעת יושבי בה

³⁵לה ישם מדבר לאגם-מים וארץ ציה למצאי מים

³⁶לו ויושב שם רעבים ויכוננו עיר מושב

³⁷לז ויזרעו שדות ויטעו כרמים ויעשו פרי תבואה

³⁸לח ויברכם וירבו מאד ובהמתם לא ימעיט

³⁹לט וימעטו וישחו-- מעצר רעה ויגון

⁴⁰מ ] שפך בוז על-נדיבים ויתעם בתהו לא-דרך

⁴¹מא וישגב אביון מעוני וישם כצאן משפחות

⁴²מב יראו ישרים וישמחו וכל-עולה קפצה פיה

⁴³מג מי-חכם וישמר-אלה ויתבוננו חסדי יהוה