Read כֶּתֶר אֲרָם צוֹבָא - Tanah Aleppo Codex תהלים 109 Bible Online

תהלים 109 - כֶּתֶר אֲרָם צוֹבָא - Tanah Aleppo Codex bible

תהלים 109

¹א למנצח לדוד מזמור אלהי תהלתי אל-תחרש

²ב כי פי רשע ופי-מרמה--עלי פתחו דברו אתי לשון שקר

³ג ודברי שנאה סבבוני וילחמוני חנם

⁴ד תחת-אהבתי ישטנוני ואני תפלה

⁵ה וישימו עלי רעה תחת טובה ושנאה תחת אהבתי

⁶ו הפקד עליו רשע ושטן יעמד על-ימינו

⁷ז בהשפטו יצא רשע ותפלתו תהיה לחטאה

⁸ח יהיו-ימיו מעטים פקדתו יקח אחר

⁹ט יהיו-בניו יתומים ואשתו אלמנה

¹⁰י ונוע ינועו בניו ושאלו ודרשו מחרבותיהם

¹¹יא ינקש נושה לכל-אשר-לו ויבזו זרים יגיעו

¹²יב אל-יהי-לו משך חסד ואל-יהי חונן ליתומיו

¹³יג יהי-אחריתו להכרית בדור אחר ימח שמם

¹⁴יד יזכר עון אבתיו--אל-יהוה וחטאת אמו אל-תמח

¹⁵טו יהיו נגד-יהוה תמיד ויכרת מארץ זכרם

¹⁶טז יען-- אשר לא זכר עשות חסד וירדף איש-עני ואביון--ונכאה לבב למותת

¹⁷יז ויאהב קללה ותבואהו ולא-חפץ בברכה ותרחק ממנו

¹⁸יח וילבש קללה כמדו ותבא כמים בקרבו וכשמן בעצמותיו

¹⁹יט תהי-לו כבגד יעטה ולמזח תמיד יחגרה

²⁰כ זאת פעלת שטני מאת יהוה והדברים רע על-נפשי

²¹כא ואתה יהוה אדני-- עשה-אתי למען שמך כי-טוב חסדך הצילני

²²כב כי-עני ואביון אנכי ולבי חלל בקרבי

²³כג כצל-כנטותו נהלכתי ננערתי כארבה

²⁴כד ברכי כשלו מצום ובשרי כחש משמן

²⁵כה ואני הייתי חרפה להם יראוני יניעון ראשם

²⁶כו עזרני יהוה אלהי הושיעני כחסדך

²⁷כז וידעו כי-ידך זאת אתה יהוה עשיתה

²⁸כח יקללו-המה ואתה תברך קמו ויבשו--ועבדך ישמח

²⁹כט ילבשו שוטני כלמה ויעטו כמעיל בשתם

³⁰ל אודה יהוה מאד בפי ובתוך רבים אהללנו

³¹לא כי-יעמד לימין אביון-- להושיע משפטי נפשו