Read כֶּתֶר אֲרָם צוֹבָא - Tanah Aleppo Codex תהלים 116 Bible Online

תהלים 116 - כֶּתֶר אֲרָם צוֹבָא - Tanah Aleppo Codex bible

תהלים 116

¹א אהבתי כי-ישמע יהוה-- את-קולי תחנוני

²ב כי-הטה אזנו לי ובימי אקרא

³ג אפפוני חבלי-מות--ומצרי שאול מצאוני צרה ויגון אמצא

⁴ד ובשם-יהוה אקרא אנה יהוה מלטה נפשי

⁵ה חנון יהוה וצדיק ואלהינו מרחם

⁶ו שמר פתאים יהוה דלתי ולי יהושיע

⁷ז שובי נפשי למנוחיכי כי-יהוה גמל עליכי

⁸ח כי חלצת נפשי ממות את-עיני מן-דמעה את-רגלי מדחי

⁹ט אתהלך לפני יהוה-- בארצות החיים

¹⁰י האמנתי כי אדבר אני עניתי מאד

¹¹יא אני אמרתי בחפזי כל-האדם כזב

¹²יב מה-אשיב ליהוה-- כל-תגמולוהי עלי

¹³יג כוס-ישועות אשא ובשם יהוה אקרא

¹⁴יד נדרי ליהוה אשלם נגדה-נא לכל-עמו

¹⁵טו יקר בעיני יהוה-- המותה לחסידיו

¹⁶טז אנה יהוה כי-אני עבדך אני-עבדך בן-אמתך פתחת למוסרי

¹⁷יז לך-אזבח זבח תודה ובשם יהוה אקרא

¹⁸יח נדרי ליהוה אשלם נגדה-נא לכל-עמו

¹⁹יט בחצרות בית יהוה-- בתוככי ירושלם הללו-יה