Read כֶּתֶר אֲרָם צוֹבָא - Tanah Aleppo Codex תהלים 118 Bible Online

תהלים 118 - כֶּתֶר אֲרָם צוֹבָא - Tanah Aleppo Codex bible

תהלים 118

¹א הודו ליהוה כי-טוב כי לעולם חסדו

²ב יאמר-נא ישראל כי לעולם חסדו

³ג יאמרו-נא בית-אהרן כי לעולם חסדו

⁴ד יאמרו-נא יראי יהוה כי לעולם חסדו

⁵ה מן-המצר קראתי יה ענני במרחב יה

⁶ו יהוה לי לא אירא מה-יעשה לי אדם

⁷ז יהוה לי בעזרי ואני אראה בשנאי

⁸ח טוב לחסות ביהוה-- מבטח באדם

⁹ט טוב לחסות ביהוה-- מבטח בנדיבים

¹⁰י כל-גוים סבבוני בשם יהוה כי אמילם

¹¹יא סבוני גם-סבבוני בשם יהוה כי אמילם

¹²יב סבוני כדבורים-- דעכו כאש קוצים בשם יהוה כי אמילם

¹³יג דחה דחיתני לנפל ויהוה עזרני

¹⁴יד עזי וזמרת יה ויהי-לי לישועה

¹⁵טו קול רנה וישועה--באהלי צדיקים ימין יהוה עשה חיל

¹⁶טז ימין יהוה רוממה ימין יהוה עשה חיל

¹⁷יז לא-אמות כי-אחיה ואספר מעשי יה

¹⁸יח יסר יסרני יה ולמות לא נתנני

¹⁹יט פתחו-לי שערי-צדק אבא-בם אודה יה

²⁰כ זה-השער ליהוה צדיקים יבאו בו

²¹כא אודך כי עניתני ותהי-לי לישועה

²²כב אבן מאסו הבונים-- היתה לראש פנה

²³כג מאת יהוה היתה זאת היא נפלאת בעינינו

²⁴כד זה-היום עשה יהוה נגילה ונשמחה בו

²⁵כה אנא יהוה הושיעה נא אנא יהוה הצליחה נא

²⁶כו ברוך הבא בשם יהוה ברכנוכם מבית יהוה

²⁷כז אל יהוה--ויאר-לנו אסרו-חג בעבתים--עד קרנות המזבח

²⁸כח אלי אתה ואודך אלהי ארוממך

²⁹כט הודו ליהוה כי-טוב כי לעולם חסדו