Read כֶּתֶר אֲרָם צוֹבָא - Tanah Aleppo Codex תהלים 132 Bible Online

תהלים 132 - כֶּתֶר אֲרָם צוֹבָא - Tanah Aleppo Codex bible

תהלים 132

¹א שיר המעלות זכור-יהוה לדוד-- את כל-ענותו

²ב אשר נשבע ליהוה נדר לאביר יעקב

³ג אם-אבא באהל ביתי אם-אעלה על-ערש יצועי

⁴ד אם אתן שנת לעיני לעפעפי תנומה

⁵ה עד-אמצא מקום ליהוה משכנות לאביר יעקב

⁶ו הנה-שמענוה באפרתה מצאנוה בשדי-יער

⁷ז נבואה למשכנותיו נשתחוה להדם רגליו

⁸ח קומה יהוה למנוחתך אתה וארון עזך

⁹ט כהניך ילבשו-צדק וחסידיך ירננו

¹⁰י בעבור דוד עבדך-- אל-תשב פני משיחך

¹¹יא נשבע-יהוה לדוד אמת-- לא-ישוב ממנה מפרי בטנך-- אשית לכסא-לך

¹²יב אם-ישמרו בניך בריתי-- ועדתי זו אלמדם גם-בניהם עדי-עד-- ישבו לכסא-לך

¹³יג כי-בחר יהוה בציון אוה למושב לו

¹⁴יד זאת-מנוחתי עדי-עד פה-אשב כי אותיה

¹⁵טו צידה ברך אברך אביוניה אשביע לחם

¹⁶טז וכהניה אלביש ישע וחסידיה רנן ירננו

¹⁷יז שם אצמיח קרן לדוד ערכתי נר למשיחי

¹⁸יח אויביו אלביש בשת ועליו יציץ נזרו